Osmani e Kurti homazhe te varri i Ibrahim Rugovës në 13-vjetorin e Pavarësisë së Kosovës

PRISHTINË, 17 shkurt/ATSH/- Me rastin e 13-vjetorit të Pavarësisë së Kosovës, ushtruesja e detyrës së presidentit, Vjosa Osmani së bashku me kandidatin e Lëvizjes Vetëvendosje për kryeministër, Albin Kurti kanë bërë homazhe pranë varrit të ish-presidentit, Ibrahim Rugova.

“E nderuam arkitektin e Pavarësisë së Kosovës, presidentin historik, Ibrahim Rugova. Njeriun që sublimoi dhe unifikoi kërkesat e shqiptarëve të Kosovës për liri, pavarësi dhe sovranitet. Njeriu që i hapi dyert e mbarë botës në mënyrë që zëri ynë, zëri i popullit të Kosovës të kumbojë dhe dëgjohet kudo”, tha ai.

“Sot ne kujtojmë personalitetet politike, historike dhe kombëtare në faza dhe mënyra të ndryshme. Andaj ne jemi te presidenti i parë, i republikës së parë të Kosovës i cili është edhe presidenti i parë i Kosovës së çliruar për të vazhduar me aktivitete të tjera. Në veçanti falënderojmë qytetarët e Kosovës që kanë kontribuuar për këtë ditë të rëndësishme, përvjetorin e 13 të cilën e shënojmë sot”, tha ai.

Me rastin e 13-vjetorit të Pavarësisë së Kosovës, ushtruesja e detyrës së presidentit, Vjosa Osmani bashkë me kandidatin për kryeministër nga Lëvizja Vetëvendosje bënë homazhe edhe pranë varrit të veprimtarit kombëtar, Adem Demaçi.

Osmani tha se Demaçi është simboli i rezistencës së shqiptarëve, i cili para lirisë individuale ka vendosur lirinë kolektive.

“Sapo nderuam simbolin e rezistencës së shqiptarëve në Kosovë. Njeriun i cili para lirisë individuale e vendosi lirinë kolektive dhe para interesit të vet, e vendosi interesin e përgjithshëm. Veprimtarin e çështjes kombëtare, zotëri Adem Demaçi”, tha Osmani.

Ndërsa, lideri i Lëvizjes Vetëvendosje, Albin Kurti tha se Demaçi është shqiptari që nuk është thyer dhe dorëzuar asnjëherë.

“Me të drejtë baca Adem Demaçi është quajtur Mandela shqiptar, por unë do të thoja se as më Evropë nuk ka një shembull të ngjashëm me 28 vite burg është shqiptari që ka vuajtur më së gjati, por që edhe që nuk është thyer dhe dorëzuar asnjëherë”, tha ai.

Osmani: Prekazi, ikonë e pavarësisë së Kosovës që i përkujton botës gjenocidin serb

Me rastin e 13-vjetorit të Pavarësisë së Kosovës, ushtruesja e detyrës së presidentit, Vjosa Osmani bashkë me kandidatin për kryeministër nga Lëvizja Vetëvendosje, Albin Kurti, bënë homazhe në kompleksin memorial “Adem Jashari” në Prekaz.

Ata vlerësuan lart jetën dhe veprën e komandantit Adem Jashari, familjes së tij dhe gjithë viktimave të gjenocidit serb në Kosovë.

Osmani tha se kompleksi memorial “Adem Jashari”, ku prehet komandanti Adem Jashari dhe familja e tij, është ikonë e lirisë së Kosovës.

Ajo tha se familja Jashari është simbol i sakrificës më sublime të popullit shqiptar për liri.

“Këtu është vendi ku çdo ditë duhet t’ia kujtojmë vetes dhe botës se këtu gjenden dëshmitë e gjenocidit serb, dëshmitë e qëllimit të Serbisë për shfarosjen e popullit shqiptar. Këtu është edhe dëshmia më e mirë e atdhedashurisë, sakrificës për komb dhe për liri. Natyrisht, në këtë përvjetor të pavarësisë së shtetit tonë, përkulemi para veprës dhe heroizmit të komandantit legjendar, të gjithë UÇK-së, të gjithë dëshmorëve dhe të rënëve për liri dhe para sakrificës të gjitha viktimave civile të popullit tonë, të cilët ranë në mënyrë që ne sot të gëzojmë shtetin tonë të pavarur”, tha ajo.

Kurti: Prekazi heroik është vendi i kushtrimit për çlirim

Ndërsa lideri i Lëvizjes Vetëvendosje, Albin Kurti tha se Prekazi është vendi i kushtrimit për çlirim, që e dëshmon më së miri sesa i lartë është çmimi i lirisë.

“Prekazi heroik është vendi i kushtrimit për çlirim dhe vendi që na e përkujton sesa i lartë është çmimi i lirisë dhe sesa të privilegjuar jemi ne që jetojmë dhe festojmë 13 vjetorin e pavarësisë që i ka rrënjët në gjakun e dëshmorëve dhe martirëve të kombit tonë. Tre brezat e familjes Jashari luftuan dhe u sakrifikuan, gjysma e tyre burra e gjysma gra dhe fëmijë, dhe duke u rikthyer këtu ne e bëjmë më të fuqishëm shtetndërtimin demokratik, zhvillimin socio-ekonomik dhe drejtësinë institucionale sepse i tillë është edhe amaneti i dëshmorëve dhe dëshirat e popullit tonë”, tha Kurti.

Gjatë ditës së sotme, Osmani dhe Kurti homazhe bënë edhe pranë varrit të ish-presidentit Ibrahim Rugova dhe pranë varrit të veprimtarit Adem Demaçi./N.Jakupi/

/KosovaPress/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.