Futsall/ Kombëtarja në Kroaci, përgatitjet e fundit për duelin e parë zyrtar

TIRANË, 26 janar /ATSH/ Kombëtarja shqiptare e Futsallit ka udhëtuar të hënën drejt Kroacisë në prag të ndeshjes së parë për eliminatoret e Kampionatit Europian 2022, njoftoi sot FSHF.

Skuadra e drejtuar nga Erind Resuli është shortuar në Grupin 1 së bashku me Ukrainën, Kroacinë dhe Danimarkën.

Delegacioni kuqezi i është nënshtruar ditën e diel testeve Covid-19 me tampon dhe kanë rezultuar negativë që të gjithë.

Pas marrjes së rezultateve Kombëtarja është nisur për në transfertën kroate, teksa më 27 janar në Varazhdin do të zhvillojë duelin e parë të këtyre eliminatoreve. Skuadra ka zhvilluar edhe seancën e parë stërvitore në Kroaci pasditen e së hënës në “Arena Varazhdin”, pikërisht aty ku do të luhet edhe sfida e parë zyrtare e Europianit.

Trajneri Resuli që ka pasur në dispozicion të gjithë lojtarët e grumbulluar dhe deri tani nuk ka asnjë dëmtim apo probleme fizike.

Ndërkaq, më 31 janar kuqezinjtë do të zhvillojnë edhe duelin e dytë, pasi do të përballen me Ukrainën në Tiranë. Takimi do të luhet në sallën e Parkut Olimpik.

/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.