“Numri i shtrimeve në spital ka rënë”/ Pipero për ATSH-në: Ende larg imunitetit të tufës nga COVID-19

TIRANË, 25 janar/ATSH/ Mjeku i njohur infeksionist Pëllumb Pipero deklaroi sot “ka shtim të rasteve pozitivë, por në fakt nuk ka shkuar paralel me numrin e rasteve të shtruara në spital. Dje në spitalin Infektiv janë shtruar vetëm 3 raste nga 10 deri 20 që shtroheshin ditë më parë”.

Në një intervistë për ATSH-në, mjeku Pipero theksoi se “numri i shtrimeve realisht ka rënë, pasi moshat e ekspozuara tashmë që rezultojnë pozitivë janë mosha të reja, që janë më në aktivitet, në marrëdhënie pune etj. Pavarësisht se janë pozitivë sëmuren më pak dhe kanë gjithnjë e më pak nevojë që të shtrohen në spital”.

“Ndërkohë që për shkak të kushteve të motit, të kujdesit të shtuar moshat e vjetra dhe të sëmurët kronikë janë më të rezervuar qoftë për të dalë, por edhe duke respektuar masat si përdorimin e maskës, distancën dhe larjen e duarve”, – tha Pipero.

Lidhur me imunitetin e tufës, doktor Pipero u shpreh se “ne jemi ende larg, qoftë edhe bota, të të fituarit të imunitetit të tufës. Nuk bëhet fjalë për imunitet masiv të arritur përmes vaksinës, sepse vaksina sapo ka filluar dhe duhet të paktën në rang global që të kalojnë 5-6 muaj nga fillimi i vaksinimit që të arrihet të kalohet 50-60 % i popullatës në nevojë për t’i vaksinuar dhe duke përfshirë edhe personat që tashmë e kanë kaluar, mendoj se do të arrihej imuniteti i tufës”.

“Ndërkohë që dalja e 2-3 varianteve të reja të koronavirusit të ri, ka shumë pikëpyetje sa i takon arritjes së imunitetit të tufës, sepse nuk kemi të dhëna të sakta nëse do kemi imunitet të vlefshëm edhe ndaj dy varianteve të reja të COVID-19, në raport me ata që e kanë kaluar apo që janë vaksinuar. Na duhet kohë të themi nëse e kemi kaluar apo po e arrijmë imunitetin e tufës”, – shtoi Pipero për ATSH.

Mjeku Pipero u shpreh se “vendi ynë renditet në vendet me ekspozim të lartë dhe mbi 30% e popullatës duhet të ketë rënë në kontakt me COVID-19”.

Sa i përket pyetjes nëse kemi në Shqipëri raste me koronavirusin e ri, Pipero thekson se “nuk kemi ende të identifikuar raste që mund të dyshohen me variantet reja, pasi çohen në laboratorët e referencës në Gjermani, por deri tani nuk kemi pasur si këto raste”.

I pyetur nëse kanë shfaqur probleme mjekët dhe infermierët që kanë kryer vaksinën antiCovid në Shqipëri, doktor Pipero u shpreh se “nuk ka pasur efekte anësore madhore”.

/k.s/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.