DPSHTRR: Regjistrimi për herë të parë i autoveturave me vit prodhimi nën 2005, reduktohet me 80 % krahasuar me 2018-ën

TIRANË, 20 janar/ATSH/ Gjatë vitit 2020, DPSHTRR raporton 43 661 autovetura të regjistruara për herë të parë në drejtoritë rajonale.

Vihet re se 29 % e autoveturave të regjistruara për herë të parë janë me vit prodhimi 2010 e sipër, 63 % me vit prodhimi 2005-2009 dhe 8 % me vit prodhimi më të vjetër se 2005.

“Shifra të tilla tregojnë trendin pozitiv në regjistrimin e autoveturave të reja e të uljes së regjistrimit të autoveturave me vit prodhimi nën 2005, si rrjedhojë e VKM Nr. 633, datë 26.10.2018 për kufizimin e importit të mjeteve nën kategorinë mjedisore EURO 4, si pjesë e politikave kundër ndotjes së ajrit dhe mbrojtjes së mjedisit”, thuhet në njoftimin zyrtar të DPSHTRR-së.

Krahasuar me vitin 2018, janë regjistruar për herë të parë 80 % më pak autovetura me vit prodhimi më të vjetër se 2005, ose janë 45 % më pak krahasuar me vitin 2019.

Ndërsa regjistrimet për herë të parë të autoveturave me vit prodhimi 2010 e lart janë shtuar ndjeshëm me +69 % krahasuar me vitin 2018, çka dëshmon rritjen e interesit për importin dhe regjistrimin e mjeteve të reja dhe rinovimin e flotës në qarkullim, duke zëvendësuar gradualisht mjetet e vjetra ndotëse.

/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.