Sistem funksional meritokratik dhe ngritje e kapaciteteve profesionale të stafeve në sistemin e burgjeve

TIRANË, 19 janar/ATSH/ Ministrja e Drejtësisë, Etilda Gjonaj veçoi sot si një nga arritjet më kuptimplota gjatë këtij mandati në krye të kësaj ministrie edhe krijimin e një sistemi funksional meritokratik dhe ngritjen e kapaciteteve profesionale të stafeve të sistemit të burgjeve.

“Arritëm që procedurat e rekrutimit, jo vetëm që u bënë sipas një konkurimi të hapur dhe meritokratik, por gjithashtu u vlerësua pastërtia e figurës”, tha ajo.

Për herë të parë, tha ministrja, u bë rekrutimi me skantron, ku të gjitha testimet teorike u vlerësuan nga lexues elektronikë të përgjigjeve.

Gjonaj shprehu bindjen se “me këto procedura moderne rekrutimi kemi arritur të afrojmë në radhët e Policisë së Burgjeve më shumë se 826 punonjës të rinj, gjatë këtyre viteve”. /m.m/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.