TIRANË, 12 janar /ATSH/ Situata në Durrës po i kthehet normalitetit pas reshjeve të dendura të ditëve të fundit. Ekipet e punës kanë përfunduar pastrimin e shëtitores “Taulantia” dhe po vijojnë punën për pastrimin tërësisht të rrugës së Currilave.
Bashkia e Durrësit thekson se vijon puna në terren me të gjitha kapacitetet për normalizimin e situatës së krijuar nga reshjet e dendura gjatë ditëve të fundit.
“Ka përfunduar pastrimi i shëtitores Taulantia, po pastrohet tërësisht rruga e Currilave, po punohet për mbajtjen në gatishmëri të infrastrukturës kulluese dhe në të gjitha njësitë administrative vijon puna për eliminimin e pasojave të përmbytjeve. Situata në Durrës po i kthehet normalitetit, ndërkohë që ekipet vazhdojnë të jenë në gatishmëri dhe në shërbim të qytetarëve”, bën të ditur bashkia e Durrësit. /a.a/r.e/
