SHBA – DASH: Me pasurimin e uraniumit, Irani po shton përpjekjet për zhvatje bërthamore

UASHINGTON, 5 janar /ATSH-ANSA/ – Një zhvatje bërthamore, e konsideruan Shtetet e Bashkuara të Amerikës vendimin e Iranit për të shtuar pasurimin e uraniumit me 20% në uzinën e Fordos.

”Nismat e Iranit janë një përpjekje e qartë për të shtuar zhvatjen bërthamore, një përpjekje që do të dështojë”, deklaroi Departamenti amerikan i Shtetit.

Edhe Izraeli nuk do të lejojë Iranin të prodhojë armë bërthamore, deklaroi dje kryeministri izraelit Benjamin Netayahu në përgjigje të njoftimit të Teheranit se ka rritur pasurimin e uraniumit me 20%.

“Vendimi i Iranit për të vazhduar shkeljen e angazhimeve të tij, për të rritur nivelin e pasurimit dhe përparimin e kapacitetit industrial për pasurimin e uraniumit nuk mund të shpjegohet në asnjë mënyrë tjetër përveç se me realizimin e mëtejshëm të qëllimit të tij për të zhvilluar një program ushtarak bërthamor”, deklaroi kryeministri izraelit Benjamin Netanyahu në një deklaratë.

Irani filloi sot pasurimin e uraniumit deri në 20%, përtej kufirit prej 3,67 % të vendosur në marrëveshjen bërthamore të vitit 2015.

Ky proces është në përputhje me një ligj të ri bërthamor të miratuar së fundmi nga parlamenti.

Ligji i ri lejon një prodhim vjetor prej 120 kilogramësh në nivelin 20 %. Ai gjithashtu lejon që agjencia atomike e vendit të prodhojë 500 kilogram uranium më pak të pasuruar në muaj./ /os/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.