Konsullatat e Shqipërisë dhe Kosovës, në të njëjtën godinë në Strugë

TIRANË, 5 dhjetor/ATSH/Shqipëria dhe Kosova do të ndajnë të njëjtën godinë konsullore në qytetin e Strugës, Maqedoni e Veriut, në shërbim të qytetarëve shqiptarë të dy shteteve.

Ministri në detyrë për Europën dhe Punët e Jashtme, Gent Cakaj, njoftoi mbi marrëveshjen e nënshkruar në takimin me Ministren e Jashtme dhe të Diasporës së Republikës së Kosovës, Meliza Haradinaj-Stublla. Nëpërmjet kësaj marrëveshjeje tashmë zyrtarisht, Republika e Shqipërisë dhe Kosovës do të ndajnë të njëjtën godinë  konsullore në qytetin e Strugës.

“Sado simbolik të duket ky veprim, është megjithatë një dëshmi e prekshme, se zbatimi i projektit të shfrytëzimit të përbashkët të hapësirave të ambasadave a konsullatave mes Kosovës e Shqipërisë po vazhdon. Ky projekt duhet të vazhdojë me çdo kusht në çdo vend ku ka mundësi objektive”, -u shpreh Cakaj.

Nga ana tjetër, Cakaj theksoi se edhe marrëveshja e nënshkruar nga partitë politike shqiptare të Luginës së Preshevës, për të vepruar si një forcë e vetme në Medvegjë mbart një rëndësi të veçantë. Sipas, Kreut të Diplomacisë deri sa të ketë unitet e mobilizim të brendshëm, edhe angazhimi i dy qeverive kundër procesit të fshirjes së adresave do të bëhet më i fuqishëm.

“S’ka fjalë, ndërkaq, se ne do të vazhdojmë përpjekjen tonë për të shtuar mbështetjen politike dhe institucionale, veçanërisht për shqiptarët në Medvegjë, Bujanoc dhe Preshevë”- u shpreh Kryediplomati.

/m.m/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.