Zhvillimi i axhendës së Ballkanit Perëndimor/ Kushi: Në fokus, edukimi, trajnimi, kërkimi dhe inovacioni

TIRANË, 2 dhjetor/ATSH/Ministrja e Arsimit, Sportit dhe Rinisë, Evis Kushi mori pjesë në ministerialin virtual të organizuar nga Komisioni Europian dhe presidenca Gjermane në Këshillin e BE, me fokus zhvillimin e agjendës së Ballkanit Perëndimor mbi Edukimin, Trajnimin, Kërkimin dhe Inovacionin.

Gjatë ministerialit, ministrja Kushi nënvizoi mbështetjen e Shqipërisë ndaj kësaj axhende, ndërsa është ndalur gjithashtu tek masat e ndërmarra në vend në lidhje me mbështetjen e nxënësve për të ndjekur mësimin në distancë për shkak të rrethanave të ndikuara nga COVID-19.

“Njëkohësisht, ndava bindjen se Plan Veprimi i Edukimit Dixhital (2021-2027) nga Komisioni Europian do të jetë gjithashtu një vlerë e shtuar për të gjithë në përmirësimin e aftësive digjitale të brezave të ardhshëm në një botë që po zhvillohet me shpejtësi”, cilësoi Kushi.

Në fjalën e saj, ajo ka përshëndetur gjithashtu edhe vendimin për fillimin e Iniciativës së Universiteteve Europiane në rajonin e Ballkanit Perëndimor, nismë e kërkuar zyrtarisht nga Shqipëria në 2018-tën, duke nënvizuar se “pjesëmarrja në të cilën do të mbështesë universitetet tona të bëjnë progres të konsiderueshëm në procesin e ndërkombëtarizimit dhe të bëhen pjesë gjithashtu e aleancave me universitetet europiane”. /a.a/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.