TIRANË, 26 nëntor/ATSH/ Shkolla “Hasan Koçi” në Shkozet, Durrës, e dëmtuar rëndë nga tërmeti i 26 nëntorit 2019, rilindi më e madhe, më e fortë dhe më e bukur.
Kryeministri Edi Rama ndau sot pamje nga kjo shkollë, e rindërtuar tërësisht sipas standardeve europiane dhe me kushte optimale për nxënësit e mësuesit.
Rreth 1000 nxënës të shkollës 9-vjeçare në Shkozet, bashkia Durrës kanë tashmë në dispozicion shkollën e rindërtuar me ambiente të reja, me kushte dhe standarde europiane.
Shkolla 9-vjeçare “Hasan Koçi” ka 10 klasa të ciklit të ulët, 8 klasa të përgjithshme për ciklin 9-vjeçar dhe 4 laboratorë, bibliotekë, palestër dhe fushë sporti të hapur, infermieria, dhoma e posaçme për psikologun dhe mjediset ndihmëse të shërbimit.
Shkolla është një objekt trekatësh dhe veç ambienteve, klasave, laboratorëve, ka dhe palestrën dhe ambientet e tjera sportive.
Në projektin e rindërtimit përfshihet dhe gjelbërimi dhe sistemi i të gjitha ambienteve përreth saj. Shkolla ka shkallët e emergjencës dhe ashensor në pjesën e hyrjes.
Në qarkun e Durrësit do të ndërtohen 32 objekte të reja arsimore, me financim nga buxheti i shtetit dhe donatorët.
/m.m/j.p/r.e/
