Bujqësia zuri 1.4% e totalit të kredisë për biznesin

TIRANË, 19 nëntor /ATSH/ Kreditimi i bujqësisë në tremujorin e tretë të këtij viti zuri 1.4% e totalit të kredisë për biznesin.

Banka e Shqipërisë bën të ditur se kjo peshë është e ngjashme me fundin e vitit 2019.

Ndërkohë që dinamika e financimit të bujqësisë po merr ritëm të ri vitet e fundit.

Qeveria ka marrë iniciativa për rritjen e financimit të këtij sektori që gjeneron rritje të prodhimit vendas.

Ndër më të rëndësishmet ishte bashkëpunimi i qeverisë shqiptare me Bankën Europiane për Rindërtim dhe Zhvillim, për skemën ambicioze të garancisë financiare për fermerët. Ndërsa po vijojnë skemat e subvencionimit dhe programet e ndryshme me financim edhe nga donatorët, të cilat po injektojnë financim të vazhdueshëm në këtë sektor.

Sipas ekspertëve rritja e ndjeshme e financimit vitet e fundit në vlera shumë më të larta në raport me vitet më parë për këtë sektor, është një sinjal pozitiv i trendit të rritjes ku po hyn bujqësia sot. /j.p/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.