“Kemi paguar fondin e përcaktuar për vaksinat e COVAX”/ Nelaj: E kemi të gatshëm programin e vaksinimit

TIRANË, 18 nëntor/ATSH/ Përgjegjëse e sektorit të vaksinimit në Institutin e Shëndetit Publik, Erida Nelaj deklaroi sot se qeveria shqiptare është e përgatitur për të shpërndarë vaksinën e COVID-19.

Gjatë një interviste në medie, Nelaj tha se ne e kemi të gatshëm programin e vaksinimit, pasi kemi kryer edhe më herët fushata vaksinimi, si ajo e vitit 2 000 apo ajo e poliomelitit.

“Përveç planeve madhore do të ketë edhe mikroplane për çdo bashki, ku do të evidentohen fillimisht të sëmurët klinik e kategori të tjera që janë më të riskuarat”, tha ajo.

Nelaj u shpreh se Shqipëria është pjesë e COVAX, që është një mekanizëm prokurimi, pasi nuk mund të jesh i vetëm për të siguruar vaksinën.

“Kemi shprehur interes dhe e kemi paguar fondin e përcaktuar për vaksinat e COVAX. Presim të merret vendimi përsa i përket sigurisë dhe ne do t’i sigurojmë këto vaksina nëpërmjet COVAX”, deklaroi Nelaj.

Përfaqësuesja e ISHP-së siguroi se vaksina do të jetë falas për të gjithë popullatën./a.gjonaj//a.a/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.