Po merr formë terminali i pasagjerëve, zgjatja e zgjerimi i pistës/ Punime intensive në Aeroportin e Kukësit për të nisur fluturimet vitin ardhshëm

TIRANË, 31 tetor/ATSH/ Kryeministri Edi Rama inspektoi sot kantierin e Aeroportit Ndërkombëtar të Kukësit, ku falë punës që vazhdon intensivisht po merr formë terminali i pasagjerëve, po bëhet zgjatja e zgjerimi i pistës dhe po realizohet gjithçka sipas standardeve të Bashkimit Europian për të nisur fluturimet vitin ardhshëm.

Rama theksoi se “aktualisht po bëhet zgjatimi me 300 metra i pistës së aeroportit”.

“Më 23 prill unë do sjell këtu ata të Londrës, të PD-së. Të vijnë të votojnë për Lulin dhe të marrin dhe Ilirin dhe Monikën”, tha Rama.

Kryeministri theksoi se “normalisht në pranverë duhet të mbaroj edhe ura e re, nga prilli ose maji dhe gjithë sistemi i Rrugës së Kombit”.

“Në këtë mënyrë bëhet Rruga e Kombit spektakël pastaj, edhe me ndriçim natën, se ishte si shteg”, shtoi Rama.

Ndërkohë ai theksoi se “me ndërtimin e aeroportit i hapet përfundimisht rrugë edhe  investimit në Shishtavec”.

Kryetari i bashkisë Kukës, Safet Gjici u shpreh se “paralelisht me punimet në aeroport, do të bëhet edhe rruga e re për të gjithë ata që vijnë nga Kosova drejt Aeroportit të Kukësit”./m.m/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.