Kosovë/ Rritja e rasteve me Covid-19, Zemaj njofton për masa të reja

PRISHTINË, 17 tetor/ATSH/ Rritja e numrit të rasteve me Covid-19 në Kosovë, ka bërë që Ministria e Shëndetësisë të ndërmarrë disa masa.

Ministri Armend Zemaj ka urdhëruar të gjitha institucionet qendrore dhe lokale, t’i ndalin urgjentisht seminaret, punëtoritë dhe format tjera të organizimit ku ka grumbullim njerëzish, sikurse edhe veprimtaritë e ndryshme, të panevojshme.

Po ashtu Zemaj ka bërë të ditur se deri më sot, 410 shkolla janë testuar, 10 prej tyre me rekomandim të IKSHPK-së, kanë kaluar nga skenari A në skenarin C. Këtë javë, tri nga to, kanë kaluar në skenarin C.

Ndërsa testimet sot kanë arritur rekord brenda 24 orëve.

“Janë bërë 1.028 teste, prej tyre janë 148 raste pozitive e asnjë rast të vdekjes nga Covid-19”, u shpreh Zemaj.

“Policia e Kosovës dhe të gjitha inspektoratet pa dallim, bashkë me komunat dhe shtabet emergjente, duhet të veprojnë urgjentisht në parandalimin e përkeqësimit të situatës.

Së bashku, inspektimet duhet të vazhdojnë me ritëm të shtuar, gjobat të jepen sipas Ligjit për luftimin e pandemisë Covid-19 dhe të zbatohet me përpikëri, pa përjashtim.

Secili institucion të ketë veprime në pajtim me ligjin dhe në ditët në vijim do të ketë raportim për aktivitetet e ndërmarra për të parandaluar një valë tjetër, e cila në rrethanat edhe të gripit sezonal dhe viruseve tjerë eventual, mund të shkaktojnë përkeqësim të situatës së pandemisë”, shprehet Zemaj. /KosovaPress/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.