Pustec/ Nis puna për restaurimin e shtëpisë së shkrimtarit të njohur Sterjo Spasse

TIRANË, 16 tetor/ATSH/ Në bashkinë e Pustecit, Korçë ka nisur puna për restaurimin e shtëpisë së shkrimtarit të njohur Sterjo Spasse.

Lajmi u bë i ditur nga ministrja e Kulturës, Elva Margariti, e cila theksoi se “ky restaurim është një bashkëpunim ndërkufitar, mes Bashkisë Pustec, Bashkisë së Bitolës, me ndihmën e vyer të Drejtorisë Rajonale të Trashëgimisë Kulturore, Korçë dhe me financim nga Bashkimi Europian”.

“Kjo shtëpi është jo vetëm objekt kujtese për autorin e romanit të parë filozofik shqiptar, “Pse?”, por edhe një nxitje zhvillimi për gjithë zonën e Prespës”, – tha Margariti.

Kthimi në muze i shtëpisë së Sterjo Spasses do të jetë një vlerë e shtuar për fshatin Gollomboç, por edhe për të gjithë bashkinë e Pustecit. Me përfundimin e rikonstruksionit shtëpia e shkrimtarit do të pajiset edhe me objekte, të cilat janë përdorur prej tij apo edhe me dorëshkrime dhe dokumente.

Veprimtaria letrare e Sterjo Spasses është e shumëllojshme. Shkroi punime pedagogjike, tekste shkollore u mor me përkthime, shkroi artikuj të ndryshëm, monografi, tregime, romane etj. Veprimtaria e tij, sidomos ajo letrare zë fill që nga vitet tridhjetë të shekullit të kaluar. Kjo ishte një periudhë në të cilën Sterjo Spasse u dallua me krijimet e veta, sidomos në fushën e tregimit dhe atë të romanit. Botoi katër përmbledhje tregimesh: “Kuror rinie” (1934), “Në krahët e një femre” (1934), “Nusja pa duvak” (1944) dhe “Të fala nga fshati” (1958) si dhe dhjetë romane: “Nga jeta në jetë – Pse!?” më 1935 – që mbahet si kryevepra e tij, “Afërdita” (1944), “Ata nuk ishin vetëm” (1952), “Afërdita përsëri në fshat” (1954), “Buzë iqenit” (1965), “Zjarre…” (1972), “Zgjimi” (1973), “Pishtarë” (1975), “Ja vdekje ja liri” (1978), dhe “Kryengritësit” (1983)./k.s/j.p/

 

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.