“PD marrëdhënie fiziologjike me kaosin urban dhe mbeturinat”/ Fushat sanitare të përpunimit teknologjik të mbetjeve nuk do të ndalen

TIRANË, 14 tetor/ATSH/ Kryeministri Edi Rama deklaroi sot se “Shqipëria e Rilindjes Urbane dhe e fushave sanitare të përpunimit teknologjik të mbetjeve nuk do të ndalet, deri kur në asnjë cep të shtëpisë sonë të përbashkët të mos digjen e mos kalben plehra”.

Rama iu përgjigj deklaratave të Partisë Demokratike, lidhur me impiantet e mbetjeve.

“Lulëzim, unë e di që Partia Demokratike ka një marrëdhënie fiziologjike me kaosin urban dhe mbeturinat, jo vetëm sepse një mbeturinë të komunizmit dhe një rrëmujaxhi patologjik e ka lider prej 30 vjetësh, po edhe sepse kurdo e kudo ka qeverisur plehrat i ka pasur male krenare”, tha Rama.

Ndërsa siguroi se nuk do të ndalen investimet në këtë drejtim, Rama tha se “mesjeta juaj ka vdekur e s’kthehet më”.

“Por do ti s’do ti, doni ju s’doni ju, Shqipëria e Rilindjes Urbane dhe e fushave sanitare të përpunimit teknologjik të mbetjeve nuk do të ndalet, deri kur në asnjë cep të shtëpisë sonë të përbashkët të mos digjen e mos kalben plehra, sepse mesjeta juaj ka vdekur e s’kthehet më”, tha Rama.

Ai i bëri thirrje Bashës të heqë dorë nga nostalgjia që ka për mbeturinat.

“Prandaj Lulëzim hiq dorë nga nostalgjia për mbeturinat që ke mbi krye e mbi supe dhe harroje se duke sharë, akuzuar, shpifur do ta kthesh Tiranën, Durrësin, Elbasanin, Fierin e Shqipërinë, në epokën e vargmaleve të turpshme me plehra në emër të popullit që mezi të pret në 25 prill”, shtoi Kryeministri.

Kryetari i PD-së Lulzim Basha i është përgjigjur Kryeministrit Rama duke i kërkuar që të zbatojë planin me 5 pika.

Në reagimin e tij, Basha shprehet se 75 milionë euro për mafian e plehrave i ka paguar Edi Rama nga lekët e shqiptarëve.

“Asnjë kacidhe për 100 mijë të papunë, për pensionistët, për mjekët dhe infermierët, për sipërmarrjen drejt kolapsit. Boll me vjedhje e me kakarisje gënjeshtrash dalëboje. Zbato planin me 5 pika! Tani”, thekson Basha.

/m.m//a.a//r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.