Dekorata “Nderi i Kombit” për kirurgun e shquar ortoped prof. dr. Panajot Boga (pas vdekjes)

TIRANË, 29 shtator /ATSH/ Presidenti i Republikës, Ilir Meta vlerësoi sot mjekun e shquar ortoped dhe traumatolog, kirurgun, pedagogun dhe shkencëtarin Panajot Boga (pas vdekjes) me dekoratën “Nderi i Kombit”, me motivacionin “Për kontributin dhe përkushtimin e lartë profesional dhe njerëzor në fushën e mjekësisë. Si themelues i ortopedisë dhe traumatologjisë shqiptare, duke mbështetur drejtimin e tyre me dijet, metodat e teknikat më bashkëkohore. Për vlerat si pedagog në përgatitjen e brezave të ardhshëm, kirurg dhe shkencëtar i përmasave europiane”.

Në ceremoninë solemne të dekorimit të organizuar në Presidencë ku ishin të pranishëm mjekë, kolegë, pedagogë, akademikë dhe familjarë, Meta tha se “Panajot Boga është emblema e Ortopedisë dhe e Traumatologjisë shqiptare, një kolos i vërtetë i mjekësisë sonë”.

“Vlerësimi dhe mirënjohja burojnë prej përkushtimit dhe kontributit më të lartë profesional e njerëzor ndaj popullit të tij në fushën e mjekësisë, si themelues i Shërbimit të Traumatologjisë dhe Ortopedisë moderne shqiptare dhe për mbështetjen e drejtimin e tyre me dijet, metodat dhe teknikat bashkëkohore; nga vlerat, talenti dhe veprimtaria e shquar shkencore dhe akademike në nivel kombëtar dhe ndërkombëtar; nga kontributi në formimin dhe edukimin e brezave të mjekëve të rinj, për t’i shërbyer vendit dhe qytetarëve me profesionalizëm e devocion”, tha Meta.

Si shef modern i një shërbimi universitar, prof. Boga gërshetoi në nivel të lartë profesional, aktivitetin klinik, shkencor dhe pedagogjik. Nuk mund të mos përmend me këtë rast se nga ekipi që krijoi prof. Boga numërohen të paktën 7 mjekë me titullin “Profesor”.

Novacionet e tij të shumta u implementuan në praktikën ortopedike dhe traumatologjike dhe u ngritën në rang protokollesh, që u zbatuan me sukses në sallat e operacioneve.

“Me mençurinë, energjitë dhe këmbënguljen që e karakterizonte, së bashku me kolegët e vet, profesor Panajot Boga ndërmori një nismë të guximshme. Në zbatim të propozimit të tij, në Durrës u krijua Qendra Kirurgjikale dhe e Rehabilitimit për fëmijët e moshës 3 deri në 8 vjeç”, theksoi Meta.

Shumë shpejt, kapaciteti për hospitalizimin e fëmijëve me luksacion arriti në 320 shtretër dhe ky shërbim u ofrua në tre spitale, në Tiranë dhe Durrës. Në këto shërbime, u operuan dhe u rehabilituan, gjatë mbi 20 viteve, disa mijëra fëmijë.

“Kjo punë kolosale rezultoi në modifikime dhe inovacione teknikash origjinale kirurgjikale, që u prezantuan në kongrese ortopedike të vendit dhe në botë dhe u botuan në mjaft revista të huaja prestigjioze”, shtoi Meta.

Profesor Boga është autor i mbi 100 studimeve, të cilat janë botuar në revista shkencore brenda dhe jashtë vendit.

Për meritat e tij të shquara profesionale, akademike dhe njerëzore është vlerësuar me Çmimin e Republikës të Shkallës së Parë dhe Urdhrin “Mjeshtër i Madh”.

Shërbimi i Ortopedisë dhe Traumatologjisë në Spitalin Universitar të Traumës mban emrin e nderuar Panajot Boga.

Duke lënë pas një trashëgimi të shquar, ai do jetë një model frymëzimi për të gjithë bashkëpunëtorët dhe kolegët në punët e tyre të përditshme, si dhe për studentët e tij. Do të jetë një model kirurgu unikal, që punoi deri në moshën 87-vjeçare me bisturi në dorë, me përkushtim dhe humanizëm të rrallë.

“I paharruar qoftë kujtimi i këtij njeriu të madh!”, përfundoi Meta.

/gj.mima/j.p/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.