Programi i formimit përmes punës, mundësi për të gjithë personat që nuk kanë një zanat

TIRANË, 23 shtator/ATSH/ Programi i formimit përmes punës i jep mundësi të gjithë personave që nuk kanë një zanat, apo nuk kanë patur një punë të mëparshme për t’u integruar në tregun e punës.

Zëvendësministrja e Financave dhe Ekonomisë, Dajna Sorensen deklaroi sot se ky program është 12-mujor dhe iu mundëson këtyre individëve fillimisht formimin profesional në ambientet e biznesit dhe më pas punësimin e financuar nga shteti në masën e pagës minimale.

“Gjatë një periudhe 4-mujore individët përfitojnë pagën minimale, ndërsa punëmarrësit i lehtësohet barra e kontributeve të sigurimeve shoqërore dhe shëndetësore për të gjithë periudhën 12 mujore”, tha Sorensen.

Sipas Sorensen, qeveria ka parashikuar mbështetje financiare edhe për mbikëqyrësin, apo trajnuesin e këtyre personave.

Nga ky program, çdo biznes mund të përfitojë mbështetje për punësimin e deri 21 personave.

Deklarata e zv.ministres u bënë gjatë një aktiviteti për prezantimin e programeve të punësimit, ku i pranishëm ishte edhe Kryeministri Edi Rama./a.gjonaj/j.p/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.