Shenjat e rimëkëmbjes së ekonomisë/ Eksportet shqiptare rriten me 6,2% në korrik

TIRANE, 17 gusht/ATSH/ Ekonomia shqiptare duket se po jep shenjat e para të rimëkëmbjes pas goditjes nga pandemia e COVID-19.

Eksportet shqiptare drejt tregjeve ndërkombëtare shënuan një rritje prej 6,2% gjatë muajit korrik, krahasuar me muajin qershor, bën të ditur Instituti i Statistikave (INSTAT).

Sipas raportit mbi tregtinë e jashtme të publikuar sot, në muajin korrik eksportet e mallrave arritën vlerën e 25 miliardë lekëve.

Referuar të dhënave, eksportet ishin 11,6% më të ulëta, në krahasim me të njëjtën periudhë të një viti më parë, por ato ishin 6,2% më të larta në krahasim me qershorin e këtij viti.

Edhe importet e mallrave shënuan rritje gjatë korrikut me 8,3% krahasuar me qershorin. Ato arritën vlerën e 56 miliardë lekëve. Importet gjatë korrikut ishin 5,6% më të ulët, në krahasim me një vit më parë.

Deficiti tregtar i këtij muaji është 32 miliardë lekë, duke u ulur me 0,3%, krahasuar me korrikun e 2019 dhe duke u rritur me 9,9%, në krahasim me qershorin e këtij viti./a.gjonaj//a.a/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.