SHBA – Trump ndërpret konferencën e shtypit pas të shtënave pranë Shtëpisë së Bardhë

UASHINGTON, 11 gusht /ATSH-DPA/ – Të shtëna jashtë Shtëpisë së Bardhë bënë që presidenti amerikan, Donald Trump të largohej papritur nga konferenca e tij për shtyp disa minuta pasi kishte filluar.

Presidenti e la konferencën e shtypit në Shtëpinë e Bardhë rreth tre minuta pasi filloi të fliste, pasi një agjent nga shërbimi i sigurisë i kërkoi që të dilte.

“Kishte të shtëna jashtë Shtëpisë së Bardhë”, u tha Trump gazetarëve pasi u kthye disa momente më vonë.

“Oficerët e zbatimit të ligjit qëlluan dikë, duket se është i dyshuari. Ai është duke shkuar në spital… Unë nuk mund t’ju them gjendjen e të dyshuarit”, tha Trump.

Ai tha se situata ishte “nën kontroll” dhe se ”askush tjetër nuk u lëndua gjatë incidentit”.

Shërbimet sekrete thanë më vonë në Twitter se një nga oficerët ishte dërguar gjithashtu në spital si rezultat i të shtënave.

“Kjo është shumë e pazakontë”, tha Trump.

Presidenti tha se ai besonte se i dyshuari ishte i armatosur, por nuk i dinte detajet e plota, siç është lloji i armës ose nëse ai ishte synimi i të shtënave.

Trump vlerësoi shërbimet sekrete dhe tha që ndjehej i sigurt./ a.jor.

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.