Të dënuar për vepra të rënda penale, OFL u dërgon formularin e deklarimit të pasurisë 7 personave

TIRANË, 4 gusht/ATSH/ Operacioni Forca e Ligjit u ka kërkuar justifikimin e pasurisë shtatë personave, të cilët rezultojnë të dënuar për vepra të rënda penale.

OFL njoftoi të martën, se formularin e vetëdeklarimit e ka dërguar në tre persona në Vlorë, një në Tiranë, dhe dy në Fier dhe një në Lushnjë, të cilët  kanë në kurikulën e tyre dënime për vepra të ndryshme penale.

“Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, gjatë ditëve të fundit, OFL i ka nisur kërkesat me shkrim për vetëdeklarimin e burimeve të pasurisë, shtetasve: N. S., me banim në Vlorë, i dënuar për veprën penale “Trafikim i lëndëve narkotike”; R. Z., me banim në Vlorë, i dënuar në Itali, për veprën penale “Organizatë kriminale me qëllim trafikimin ndërkombëtar të drogës”; S. B., me banim në Vlorë, i dënuar për veprën penale “Vrasja me paramendim” e mbetur në tentativë”; E. G., me banim në Tiranë, i dënuar për veprën penale “Prodhimi dhe shitja e narkotikëve”; P. K., me banim në Fier, i dënuar për veprën penale “Vrasja me paramendim”; A. R., me banim në Fier, i dënuar për veprën penale “Trafik i femrave për prostitucion”; L. H., me banim në Lushnjë, i dënuar për veprat penale “Vrasja në rrethana cilësuese” e mbetur në tentativë, “Armëmbajtja pa leje” dhe “Prishja e qetësisë publike””, njofton  OFL.

“Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme. OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special”, sqaron OFL. /r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.