Emërimi i drejtuesit të BKH-së/ Gjonaj: Hap i fortë përpara në rezultatet e reformës në drejtësi

TIRANË, 30 korrik/ATSH/ Ministrja e Drejtësisë, Etilda Gjonaj e ka cilësuar si moment të rëndësishëm dhe një hap përpara në rezultatet e reformës në drejtësi emërimin e drejtueses së Byrosë Kombëtare të Hetimit (BKH).

“Emërimi sot i drejtuesit të BKH-së është një moment shumë i rëndësishëm, një hap i fortë përpara në rezultatet e reformës në drejtësi. BKH është gur themeli në ndërtesën e drejtësisë penale”, deklaroi Gjonaj.

Për herë të pare, vuri në dukje ministrja Gjonaj, një grua në krye të luftës kundër krimit të organizuar dhe korrupsionit është një lajm sa pozitiv, aq edhe i mirëpritur.

“Përgëzime për finalizimin e procesit SPAK & KLP, dhe falenderim partnerëve, veçanërisht OPDAT për mbështetjen që i dhanë”, u shpreh Gjonaj.

Këshilli i Lartë i Prokurorisë emëroi sot unanimisht drejtuesen e Byrosë Kombëtare të Hetimit, Aida Hajnaj.

Aida Hajnaj u propozua nga SPAK, pasi 3 kandidatët e tjerë ishin skualifikuar.

Hajnaj më parë mbante detyrën e zëvendësdrejtores së Policisë së Shtetit.

/a.gjonaj/ /a.g//r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.