Durrës/ Kishin zënë me shezlongë plazhin publik në fshatin Rinia, procedohen penalisht 2 shtetas

TIRANË, 29 korrik/ATSH/ Policia e Durrësit ka proceduar penalisht dy shtetas, për veprën penale “Pushtimi i tokës”, pasi kishin zënë me shezlongë, një sipërfaqe të plazhit publik në fshatin Rinia, Durrës, pa lejen e organeve përkatëse.

Specialistët për Hetimin e Krimeve në Komisariatin e Policisë Durrës, në vijim të kontrolleve të vazhdueshme për evidentimin dhe ndëshkimin e atyre personave që zaptojnë hapësirën publike duke vendosur shezlongë në mënyrë të paligjshme, proceduan penalisht shtetasit -F. Gj., 43 vjeç  dhe  M. M., 54 vjeç, banues në Durrës.

Gjatë kontrollit të ushtruar në fshatin Rinia, Durrës, u konstatua se shtetasit e mësipërm kishin zënë me shezlongë, një sipërfaqe të plazhit publik, pa lejen e organeve përkatëse.

Materialet i kaluan Prokurorisë së Rrethit Durrës, për veprime të mëtejshme.

Policia e Durrësit do vijojë kontrollet e pandërprera për të evidentuar dhe goditur çdo rast të zaptimit të hapësirave publike apo të ushtrimit të aktivitetit në kundërshtim me protokollet e sigurisë dhe në këtë kuadër fton qytetarët që të denoncojnë në Komisariatin Dixhital dhe në numrin 112, çdo rast të paligjshmërisë.

/gj.mima//r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.