Cakaj vijon vizitën në Suedi, takon Wallensteen: Integrimi, Këshilli i Sigurimit dhe thellimi i bashkëpunimit, pikat ku kemi mbështetje maksimale

TIRANË, 10 korrik/ATSH/ -Gjatë vizitës zyrtare në Stokholm, ministri në detyrë për Europën dhe Punët e Jashtme, zhvilloi një takim edhe me Sekretaren e Shtetit në Kryeministri, Karin Wallensteen.

Ndër temat e diskutuara në takim ishte edhe angazhimi i përbashkët në kuadër të OSBE-së, në rrafshin politik, ekonomik dhe njerëzor.

“Duke pasur parasysh se Suedia do të marrë Kryesinë e OSBE-së menjëherë pas Shqipërisë, këmbyem informacionin e nevojshëm dhe bashkërenduam veprimet në shërbim të një bartje sa më të suksesshme të Kryesisë për vitin e ardhshëm”, u shpreh Cakaj lidhur me takimin e zhvilluar.

Gjithashtu, Cakaj theksoi se Suedia mbështet synimin e Shqipërisë për ulësen e anëtarit jo të përhershëm në Këshillin e Sigurimit.

Në takimin e Ministrit në detyrë Cakaj me Sekretaren e Shtetit Wallensteen, diskutimi u fokusua gjithashtu edhe në rrugën evropiane të Shqipërisë, rëndësinë e vazhdimit të reformave dhe mbështetjen politike të Suedisë deri në anëtarësimin e plotë të vendit tonë në Bashkimin Europian.

/gj.mima//a.a/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.