Kosovë-Shqipëri/ Hapet kalimi edhe në dy pika kufitare, Qafë Prush dhe Qafë Morinë

PRISHTINE, 15 qershor/ATSH/ Kosova hap kalimin edhe në dy pika kufitare me Shqipërinë, në Qafë-Prush dhe Qafë-Morinë, të mbyllura për një kohë në ballafaqimin me pandeminë.

“Qeveria e Republikës së Kosovës ka miratuar plotësimin dhe ndryshimin e pikës 5 të Vendimit të qeverisë të datës 31 maj 2020 sipas të cilit përveç pikave kufitare në Merdare, Vërmicë, Kullë, Hani i Elezit, Jarinjë dhe Dheu i bardhë, hapen kufijtë tokësor në Republikën e Kosovës edhe pikat e kalimit të kufirit Qafë-Prush, Qafë-Morinë, Muqibabë dhe Mutivodë. Vendimi do të hyjë në fuqi nga 22 qershori i këtij viti”, thekson njoftimi i dërguar nga mbledhja e sotme.

Bëhet e ditur se, ka marrë miratimin nga qeveria e Republikës së Kosovës edhe vendimi për nisma për lidhjen e marrëveshjes ndërkombëtare tripalëshe ndërmjet qeverisë së Republikës së Kosovës, Këshillit të Ministrave të Republikës së Shqipërisë dhe qeverisë së Maqedonisë së Veriut për forcimin e bashkëpunimit në fushën e sigurisë së kufirit. Marrëveshjen në emër të qeverisë së Republikës së Kosovës do ta negociojë Ministria e Punëve të Brendshme.

“Marrëveshja synon shkëmbimin e informatave dhe rritjen e kontrollit të kalimit të lirë të kufirit në funksion të luftimit të kontrabandës dhe migrimit ilegal”, u theksua në mbledhje.

Qeveria e Kosovës e drejtuar nga Kryeministri, Avdullah Hoti ka zhvilluar mbledhjen e saj të pestë të rregullt, në të cilën ka shqyrtuar dhe miratuar vendime dhe politika të fushave të saj të përgjegjësive kushtetuese dhe ligjore.

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.