Basha: Qytetarët nuk u ndihmuan as pas tërmetit dhe as gjatë pandemisë

TIRANË, 4 qershor /ATSH/ “Rama nuk i ndihmoi qytetarët as pas tërmetit dhe as gjatë pandemisë”, është shprehur sot kryetari i Partisë Demokratike, Lulzim Basha.

“Propaganda me regji qendrore e Ramës nuk e fsheh dot dështimin. Në prill premtoi se do të punohet me 4 turne për të pastruar Thumanën nga rrënojat. Pamjet flasin vetë. “Puna” zgjati aq sa vizita dhe transmetimi me regji qendrore i mashtrimit të radhës”, ka theksuar Basha.

“Lekët e shqiptarëve i çon në xhepin e oligarkëve dhe për shpenzime luksi. Në vend që të ndihmonte qindra familje të varfra, Rama harxhoi qindra-mijë euro të taksave tona me charter luksi për fundjavë në Paris”, ka shtuar Basha.

“Ekonomia në krizë të thellë, është dështimi i Ramës, i qartë po aq sa gënjeshtrat që ai broçkullit çdo ditë shqiptarëve”, ka përfunduar kreu i PD, Lulzim Basha.

/gj.m//a.a//r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.