“Nuk fitohen zgjedhjet me ligjin e reformës apo me sistem”/ Rama: I hapur për çdo gjë mbi bazën e rekomandimeve të OSBE-ODIHR

TIRANË, 2 qershor /ATSH – I. Vata/ Kryeministri Edi Rama tha sot se është i hapur për gjithçka për të arritur përfundimin e Reformës Zgjedhore.

Në lidhje me Reformën Zgjedhore, Rama tha se “për sa i përket reformës unë i kam thënë  ato që kam pasur për të thënë. Është shumë e thjeshtë nga një sugjerim të kthyer në një kërkesë që nga Bundestagu është përfshirë në dokumentin e Këshillit për një reformë zgjedhore mbi bazën e rekomandimeve të OSBE/ODIHR që do votohet në parlament”.

“Kjo është korniza. Dhe mbi bazën e e rekomandimeve të OSBE/ODIHR ku ajo më e përsëritura shpesh është depolitizimi i administratës zgjedhore. Ne jemi të hapur deri në fund për çdo gjë, por duke qenë se në këtë proces për të ndihmuar janë përfshirë dhe partnerë miq të Shqipërisë, unë nuk dëshiroj të bëjë komente përpara sa të flasin dëshmitarët. Sigurisht unë kam diturinë e plotë dhe këndvështrimin tim mbi ecuritë e procesit dhe të ngjarjeve, por besoj ajo që na duhet është të bëjmë sa më pak polemika e lagu se lagu dhe të përpiqemi për produktin më të mirë. Nga ana jonë besoj se produkti është aty, i plotëson të gjitha kushtet mbi bazën e rekomandimeve të OSBE/ODIHR, sigurisht në një proces zgjedhorë të gjitha palët kërkojnë gjithçka. Ka palë mendojnë se me ligjin e reformës fitohen zgjedhjet, s’është e vërtetë. Zgjedhjet  fitohen me zgjedhjet e popullit. Apo që mendojnë se një ky sistem apo ai sistem bëjnë ata që i mendojnë si mrekullira, s’është e vërtetë. Është thjeshtë respektim standardesh dhe garantim standardesh. Ne kjo na intereson, për këtë kemi punuar, për këtë kemi dhënë kontributin tonë dhe besoj se e kemi bërë detyrën tonë”, tha Rama.

Rama shtoi se “nuk dua të merremi me fjalë, sepse e thashë, ka dëshmitarë. Më vjen keq që në Shqipërinë e 2020-ës të ketë ambasadorë që dalin në seli partish për të bërë një marrëveshje, apo një negociatë, apo një diskutim në interes  të përbashkët siç është diskutimi për rregullat e lojës. Mendoj se do të duhet prej kohësh ta kishim bërë vetë këtë por meqenëse palët e tjera kanë nevojë për këtë element edhe për të pasur garanci, unë jam mirënjohës miqve që janë përpjekur të ndihmojmë. Të bëjmë më të mirën duke lehtësuar procesin e komunikimit, por s’dua të bëjë koment sot për këtë pasi ka akoma të tjerë që do të flasin”.

Kryeministri Rama i pyetur nga gazetarët gjatë konferencës për shtyp nëse ishte i gatshëm për t’u ulur në një takim me kryetarin e PD-së, tha se, “jam gati të ulem me liderin e opozitës Lulzim Basha për Reformën Zgjedhore”.

Rama thekson se “unë kam qenë në opozitë vetë dhe disa herë i kam kërkuar kryeministrit të kohës që të uleshim për gjërat që duheshin diskutuar, tani kanë ndërruar pozicionet. Kur isha në opozitë kërkoja të uleshim, tani unë jam kryeministër, kërkoj të ulemi”.

Po ashtu, Rama tha se do ishte normale të uleshim për Reformën Zgjedhore. “Gjynah, humbasim kohë, humbasim energji, lodhim njerëzit, i lëmë hapësirë gjithë gënjeshtrave, sajesave dhe fantazive të pushtojnë mediet përmes informacionesh të dhëna qëllimisht për dezinformuar dhe duket se çfarë po ndodh. Në fakt është më e thjesht se kaq, do ishte  normale të uleshim. Këto janë gjëra që bëhen bashkë, megjithatë nuk jemi ende aty”, u shpreh Rama.

Në vijim, Rama tha se “mendoj se në Shqipërinë e vitit 2020 nuk është e hijshme për ne që për çështje të brendshme që lidhen me vendosjen e rregullave të lojës, siç është Reforma Zgjedhore, ku palët janë dy skuadra a më shumë që zhvillojnë një ndeshje apo një finale, ulen dhe bien dakord: sa është fusha, sa është porta, çfarë quhet faull, penallti dhe të bëhet me ambasadorë që hyjnë nëpër dyer… Megjithatë është për të thënë faleminderit se përderisa nuk e bëjnë dot hapin për ta bërë vetë, duhet ndihmë”. /r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.