Shkolla si hapësirë e sigurtë, Shahini: Dyfishim numrit të psikologëve dhe punonjësve socialë

TIRANË, 1 qershor /ATSH – I. Vata/ Ministrja e Arsimit, Sportit dhe Rinisë, Besa Shahini përmes një videomesazhi ka komunikuar një çështje të ndjeshme, por të rëndësishme për shëndetin e komunitetit shkollor.

Shahini foli për bullizmin, për dhunën në bazë gjinore dhe për abuzimin seksual, si në komunitet, ashtu edhe në shkollë.

Duke përgëzuar nxënësit që kanë gjetur kurajon të denoncojnë bullizmin, dhunën apo abuzimin që kanë përjetuar, ministrja Shahini nënvizon se kjo është e vetmja mënyrë që të rriturit dhe institucionet të kenë mundësi të dënojnë këtë dhunë, dhe të parandalojnë që kjo dhunë të ndodhë në të ardhmen. Shkolla duhet të shndërrohet në një hapësirë të sigurtë, ku nxënësi ndihet që mund të denoncojë dhunën që e ka përjetuar, apo të paraqesë çfarëdo shqetësimi që ai mund të ketë”.

“Kjo është arsyeja”, shprehet Shahini se pse para disa muajve ka filluar edhe zbatimi i politikës për shndërrimin e shkollës në një hapësirë të sigurt. Do të dyfishohet numri i psikologëve dhe punonjësve socialë përmes një riorganizimi të stafit arsimor që tashmë ka filluar. Ata do të trajnohen për çështjet gjinore dhe për çështje të ngacmimit dhe abuzimit seksual, në mënyrë që të adresojnë këto tema të ndjeshme sa më mirë që të jetë e mundur në shkollë”, thekson ajo.

Më tej, ministrja Shahini shprehet se “janë vendosur tashmë protokollet e veprimit të shpejtë, në mënyrë që sapo të bëhet një denoncim, të përjashtohen nga puna ata që janë denoncuar dhe të ndiqen penalisht. Kjo tashmë ka ndodhur për rastet që janë denoncuar dhe personat në fjalë janë duke vuajtur dënimet e merituara”.

“Përveç njohjes me rregulloren e arsimit parauniversitar dhe kodit penal, Shahini thekson domosdoshmërinë e ndryshimit të kulturës dhe mënyrës se si shoqëria jonë adreson gratë, vajzat dhe grupet e margjinalizuara. “E gjithë kjo duhet të ndryshojë”, tha ajo.

Po ashtu, ministrja Shahini kërkon edhe bashkëpunimin e medias, si një lojtar kyç në raportimin në mënyrën më të mirë dhe më të ndjeshme në rastet e dhunës kundër grave e vajzave, apo abuzimit seksual.

Në fund të videomesazhit, Shahini nënvizon nevojën se “ne duhet të punojmë së bashku që të ndryshojmë kulturën dhe të shndërrohemi në një shoqëri më të mirë që mbron grupet e margjinalizuara, një shoqëri më të mirë për fëmijët tanë”. /j.p/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.