Reforma në Drejtësi/ SHBA: Populli shqiptar foli dhe reforma duhet të ecë përpara

TIRANË, 26 maj /ATSH – I. Vata/ Ambasada e SHBA-së deklaroi sot se “Shtetet e Bashkuara mbeten vendosmërisht të përkushtuara ndaj Reformës në Drejtësi, e cila është kërkesë e popullit shqiptar”.

Ambasada e SHBA-së thekson se “në përgjigje të kësaj kërkese, në vitin 2016, Parlamenti miratoi unanimisht ligjet themelore për Reformën. Prej atëherë, janë ngritur institucione kyçe dhe zbatimi vazhdon për t’i bërë ato funksionale. Reforma është e dhimbshme, e ngadaltë dhe e papërsosur, por është e nevojshme. Reforma në drejtësi po ecën përpara dhe duhet të vazhdojë, në mënyrë që Shqipëria të bëhet anëtare e plotë e familjes europiane. E gjithë Ambasada e Shteteve të Bashkuara të Amerikës do të vijojë të mbështesë synimin e popullit shqiptar”.

“Ne nuk duhet të humbasim përqendrimin, ne nuk duhet të çorientohemi – synimi është i qartë, populli shqiptar foli dhe Reforma në Drejtësi duhet të ecë përpara, hap pas hapi”, deklaron Ambasada e SHBA-së në Tiranë. /a.g//r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.