Shahini: Shtyhen zgjedhjet në universitete, të sigurohet pjesëmarrje gjithëpërfshirëse e studentëve

TIRANË, 8 maj/ATSH/ Data e zgjedhjeve për organet drejtuese të Institucioneve Publike të Arsimit të Lartë (IAL) shtyhet deri në një moment të dytë kur mund të sigurohet pjesëmarrje më gjithëpërfshirëse e studentëve.

Ministrja e Arsimit, Sportit dhe Rinisë Besa Shahini deklaroi sot se procesi përgatitor i zgjedhjeve duhet të vazhdojë në mënyrë që IAL-të të jenë gati të fillojnë fushatën zgjedhore menjëherë pas shpalljes së datës.

Në urdhrin e Ministrisë së Arsimit, Sportit dhe Rinisë thuhet se shtyrja vjen për shkak të gjendjes së fatkeqësisë natyrore të shkaktuar nga pandemia e COVID-19, deri në një datë të caktuar nga Ministria e Arsimit, Sportit dhe Rinisë.

Ndërkohë, ministrja Shahini risolli në vëmendje të udhëheqësve të arsimit të lartë publik planifikimin e mbylljes së suksesshme të vitit akademik për studentët. /a.gjonaj//a.a/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.