Paketat ekonomike/ Spiropali: 1.95 miliard lekë në mbështetje të qytetarëve

TIRANË, 30 prill/ATSH-Maela Marini/ Ministrja e Shtetit për Marrëdhëniet me Parlamentin, Elisa Spiropali deklaroi sot në Kuvend se “paketat ekonomike në mbështetje të qytetarëve shkojnë në një fond prej 1.95 miliardë lekë, ose rreth 19 milionë dollarë”.

Në përgjigje të akuzave të opozitës, Spiropali tha në Kuvend se “të gjitha kontratat tona nuk janë sekrete, se po të ishin sekrete nuk do të ishin publike”. “Janë kontrata të njohura me ligj si kontrata për interes thelbësor të shtetit dhe janë publike, janë aty për t’i parë të gjithë”, tha ajo.

“Në cilësinë e përgjigjeve dhe akuzave në këtë kohë murtaje qeveria nuk është marrë vetëm me qese edhe pse ajo është një ndërmarrje më se e nderuar e bashkive, e shtabeve të emergjencave. Kryetarët e bashkive kanë të gjitha listat e përfituesve të ndihmave, atyre me ndihmë ekonomike, pensionistëve që raportohen në shtabin e Emergjencave emër për emër”, tha ajo.

Spiropali theksoi se “qeveria ka nxjerrë 45 urdhra përmes Ministrisë së Shëndetësisë, 27 VKM, 15 akte normative, 3 prej tyre kalojnë sot”. “Konkretisht sot kalojmë aktin normativ që bizneset e vogla edhe pse nuk janë mbyllur me ligj sërish të mos paguajnë qiranë për muajt prill, maj. Akti normativ për ndryshimin e buxhetit për t’u ardhur në ndihmë kategorive në ndihmë sociale dhe akti normativ për ndryshimin e buxhetit, ndryshimin e mënyrës së prokurimit përmes përqendrimit etj”, tha ajo.

Spiropali iu përgjigj po ashtu akuzave të opozitës, lidhur me menaxhimin e situatës nga COVID-19.

“Është interesante të shohësh se si Basha ka adoptuar stilin e të folurit të Murrizit, por këtij të fundit i shkon se nuk ka pasur ndonjëherë në dorë tendera e punë dhe nuk është i provuar në këtë lëmi, është i pastër dhe mund të flasë këtu, por Basha ka dështuar në çdo punë që ka bërë, e ka çuar për dreq sepse kur ka vajtur në gjyq nuk është përgjigjur i është shmangur përgjigjes me raport mjekësor”, tha ajo.

“Thonë që maskat janë blerë 6.5 euro në fakt janë blerë 4.14 euro, thonë maskat kanë skaduar ndërkohë skadojnë në 2023, e të tjera habira që Basha e grupi rreth tij mund t’i artikulojë. Për të mos folur pastaj për atë partinë tjetër opozitare e cila nxjerr aty një mjek-politikan apo politikan-mjek që i bën çorbë të gjitha. Është proverbiale, në kohën e tyre deti ishte kos dhe liqeni pilaf dhe me nga një lugë në brez të gjithë dhe i turreshin. Dhe duket sikur po të ishin ata në krye të kësaj pune në këto kohë patjetër që do t’i bënin ashtu siç i bëjnë, janë ëndrrat e tyre të fshehta, ato që thonë janë një manual për të kuptuar se si do të vidhnin, siç kanë vjedhur”, tha Spiropali. /j.p/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.