Durrës/ Këshilli Bashkiak miraton shembjen e 7 godinave të institucioneve arsimore të dëmtuara nga tërmeti

TIRANË, 30 prill/ ATSH- A. Fortuzi/ Këshilli bashkiak i Durrësit ka zhvilluar mbledhjen e rradhës me mjetet e komunikimit elektronik ku ka marrë disa vendime të rëndësishme, duke nisur nga ndihma ekonomike për familjet në nevojë e duke vijuar me vendime që lidhen me prishjen e disa ndërtesave publike të dëmtuara nga tërmeti i 26 nëntorit, në kuadër të procesit të Rindërtimit.

Këshilli bashkiak vendosi për miratimin e familjeve përfituese të ndihmës ekonomike nga fondi i kushtëzuar për bllok ndihmën ekonomike deri  6% dhe  fondi nga të ardhurat e bashkisë,  për muajin prill 2020. Po ashtu u miratua përdorimi i fondit prej 2’635’200 lekë, të akorduar nga organizata UNICEF në Shqipëri, për familjet në nevojë, si ndihmë financiare për shkak të gjendjes së fatkeqësisë natyrore Covid-19. Për miratimin e ngritjes së qendrës për shërbime mbrojtëse, fuqizuese dhe emergjente për fëmijën dhe familjen, si dhe përdorimin e fondit prej 5 421 264 lekë, të akorduar nga Ministria e Shëndetësisë dhe e Mbrojtjes Sociale. Për miratimin e përdorimit të fondit prej 8 607 162 lekë me tvsh, si  ndihmë ushqimore për familjet në nevojë që përfitojnë falas produkte ushqimore dhe jo ushqimore në banesë nga ana e bashkisë Durrës.

Lidhur me pasojat e tërmetit të 26 nëntorit, këshilli bashkiak i Durrësit vendosi miratimin për prishjen e detyruar të godinës, me funksion konvikt, që i përket shkollës së mesme sportive “Benardina Qeraxhi”, që mban nr. 164, të listës së transferimit, si dhe të godinës, që i përket  shkollës  9-vjeçare “Hasan Koçi”, që mban nr. 153, të listës së transferimit, që me VKM nr.  536, datë 01.05.2008, kanë  kaluar në pronësi të Bashkisë Durrës,  për shkak se janë dëmtuar nga fatkeqësia natyrore e datës 26 nëntor 2019 dhe riforcimi strukturor  i godinës nuk është e mundur të bëhet, kjo sipas aktekspertizës së thelluar, realizuar nga Instituti i Ndërtimit për shkollën e mesme sportive “Benardina Qeraxhi” dhe se riparimi i ndërtesës nuk mund të bëhet dhe rekomandohet të demolohet, kjo sipas aktekspertizës së thelluar, realizuar nga Instituti i Ndërtimit, për shkollën 9-vjeçare “Hasan Koçi”, dhe miratimin për heqjen nga kontabiliteti dhe lista përfundimtare të dy pronave që mbajnë nr. 164 dhe nr.153, që me VKM nr.  536, datë 01.05.2008, kanë kaluar në pronësi të bashkisë  Durrës.

Këshilli bashkiak i Durrësit vendosi mbi miratimin për prishjen e detyruar të katër godinave, që i përkasin shkollës 9-vjeçare “Bedrie Bebeziqi”, që mban nr. 151, të listës së transferimit, shkollës 9-vjeçare “Shaqe Mazreku”, që mban nr. 140, të listës së transferimit, shkollës 9-vjeçare “Qemal Mici”, që mban nr. 146, të listës së transferimit dhe kopshti “Met Hasa”, që mban nr. 168, të listës së transferimit, që me VKM nr. 536, datë 01.05.2008, kanë kaluar në pronësi të bashkisë Durrës,  për shkak se janë dëmtuar nga fatkeqësia natyrore e datës 26 nëntor 2019 dhe riforcimi strukturor i godinave nuk është e mundur të bëhet, kjo sipas aktekspertizës së thelluar, realizuar nga Instituti i Ndërtimit dhe miratimin për heqjen nga kontabiliteti dhe lista përfundimtare të katër pronave që mbajnë nr. 151,140,146 dhe 168, që me VKM nr. 536, datë 01.05.2008, kanë kaluar në pronësi të bashkisë Durrës.

Këshilli bashkiak i Durrësit ka vendosur edhe për prishjen e detyruar të godinës, që i përket shkollës 9-vjeçare “Xhelal Shtufi”, Shkafanë, që mban nr. 7, të listës së transferimit, si dhe të godinës  që i përket shkollës së mesme të përgjithshme “Rexhep Mezini”, Ishëm, që mban nr. 1, të listës së transferimit, që me VKM nr. 295, datë 02.05.2012, kanë  kaluar në pronësi të komunës Ishëm (sot bashkia Durrës), për shkak se janë dëmtuar nga fatkeqësia natyrore e datës 26 nëntor 2019 dhe riparimi i godinave nuk mund të bëhet, dhe është rekomanduar të demolohen, kjo sipas aktekspertizës së thelluar kryer nga Instituti i Ndërtimit, dhe miratimin për heqjen nga kontabiliteti dhe lista përfundimtare të dy pronave që mbajnë nr. 7 dhe nr. 1, që me VKM nr. 295, datë 02.05.2012, kanë kaluar në pronësi të ish-komunës Ishëm (sot bashkia Durrës). /j.p/e.w/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.