Drejtori i ri i Ekipit Këshillues dhe Ndërlidhës të NATO-s fillon mandatin 

PRISHTINE, 30 prill /ATSH/ -Gjeneral brigade Frank Best nga Forca Ajrore Gjermane sot mori detyrat e tij si drejtor i ri i Ekipit Këshillues dhe Ndërlidhës të NATO-s (NALT) nga gjeneral brigade Michael G. Oberneyer, në një ceremoni në selinë e KFOR-it në Prishtinë.

Gjatë ceremonisë, gjeneral brigade Oberneyer tha se kanë vazhduar të ndërtojnë marrëdhëniet e shkëlqyera me Ministrinë e Mbrojtjes dhe Forcën e Sigurisë së Kosovës në frymën e besimit dhe transparencës reciproke.

“Brenda mandateve tona përkatëse, ne kemi punuar së bashku për një qëllim të përbashkët: një Forcë profesionale të Sigurisë së Kosovës, me përfaqësim nga të gjitha komunitetet, duke punuar së bashku për të mirën e të gjithë qytetarëve në Kosovë”, tha ai.

Gjeneral brigade Frank Best ka ndërtuar një karrierë mbresëlënëse në Forcat Ajrore të Gjermanisë që nga anëtarësimi më 1983.  Së fundmi, ai shërbeu si shef i Degës për Politikën e Forcave në Ministrinë Gjermane të Mbrojtjes në Bon.

Ekipi Këshillues dhe Ndërlidhës i NATO-s u krijua në gusht 2016. Misioni mbështet zhvillimin e mëtejshëm të organizatave të sigurisë në Kosovë, përfshirë ofrimin e këshillave dhe mbështetjes, me fokus në ndërtimin e kapaciteteve, edukimin dhe koordinimin e trajnimeve./KosovaPress/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.