Haziri: Gjobat për mosrespektim të kufizimit të lëvizjes, të domosdoshme për të mbrojtur shëndetin publik 

PRISHTINE, 26 prill /ATSH/ Në ditën e 45 të përballjes me pandeminë COVID-19, shifrat e infektimit arrijnë në 51 raste gjithsej dhe numri i rasteve është rritur ditëve të fundit, si pasojë e mosrespektimit të rregullave, rekomandimeve dhe vendimeve të qeverisë, por edhe moszbatimin e masave mbrojtëse.

Kështu u shpreh kryetari i Komunës së Gjilanit Lutfi Haziri, në konferencën për media, cili ka apeluar për vetëpërmbajtje qytetare dhe qëndrim në shtëpi, sepse gjendja e përballjes me këtë sëmundje përkundër që është nën kontroll, ajo është e rrezikshme dhe për këtë jemi të detyruar që të veprojmë me gjoba mandatore, për persona fizikë dënimet janë deri në dy mijë euro e për ata juridik deri në 8 mijë euro.

“Hyrja e një qytetari në zonën e karantinës, në familjen e karantinuar, për motive familjare dhe mosdistancimi, ka bërë që ajo ta bartë pastaj infeksionin në familjen e saj. Pastaj prej familjes së origjinës është bartur në familjet tjera, që në përshkrim dhe rrugëtim me kontaktet e zgjeruara pastaj kemi arritur në këtë shifër prej 51 rasteve”, njoftoi kryetari Haziri.

Ai renditi një numër të madh të shkeljeve që po bëhen në vazhdimësi dhe konfirmoi se dënimet mandatore do të jenë të domosdoshme për t’u vënë në vend rendi dhe rregulli.

“Përdorimi i masave mbrojtëse është duke u neglizhuar. Shumica e shërbimeve edhe në disa markete të mëdha është duke u ofruar pa masa mbrojtëse. Punëtorët që shesin produktet, por edhe blerësit është e obligueshme dhe e domosdoshme të përdorin, maska dhe dorëza. Inspeksioni komunal do të veprojnë me gjoba direkte për të gjithë ata që thejnë rregullat”, theksoi kryetari Haziri.

Sipas një njoftimi të komunës, Haziri tha se edhe daljet e qytetarëve në rrugë në këtë fazë janë shumë më të mëdha, sepse siç bërë të ditur ai, numri i ID dhe lejet e veçanta që kemi lëshuar nuk korespondojnë me numrin aq të madh të qytetarëve në rrugë.

“Në bashkëpunim me Policinë e shtetit dhe me kompetencat shtesë të inspektorëve do të ketë rritje të aktivitetit dhe kontroll edhe më strikt për daljet e qytetarëve. Prandaj qëndroni në shtëpi dhe respektoni rregullat”, porositi ai.

Njëkohësisht dha edhe informacionet shtesë për gjendjen e të prekurve, duke spikatur rëndësinë e bashkëpunimit dhe vetpërmbajtjen.

“Fatkeqësisht e gjithë familja nga fshati Livoç i Epërm është në Spitalin e Infektivës. Në jemi në kontakt të vazhdueshëm më mjekët që të menaxhojmë shëndetin e tyre. Deri tani nga këto 51 raste, 18 janë të shëruar plotësisht, një i vdekur fatkeqësisht, në hospitalizim janë 10 raste dhe në shtëpi janë 22 raste. Një familje është e izoluar në lagjen Arbëria, pastaj një tjetër në Livoç të Epërm, një në lagjen Deremahallë dhe një në dheun e bardhë”,  tha kryetari Haziri./KosovaPress//e.m/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.