“Faleminderit vëllezër”, videomesazhi nga Lombardia/ Rama: Krenar për Shqipërinë

TIRANE, 21 prill/ATSH/ Me anë të një videomesazhi, rajoni i Lombardisë falënderoi të gjitha vendet që dërguan staf mjekësor, pajisje mbrojtëse për personelin shëndetësor dhe respiratorë.

Një vend të veçantë në këtë video zë dhe kontributi i Shqipërisë.

Videomesazhi është shpërndarë nga kryetari i rajonit të Lombardisë, Attilio Fontana, i cili përcolli falënderimet më të përzemërta edhe në emër të qytetarëve italianë.

Kryeministri Edi Rama ka ka publikuar videomesazhin duke u shprehur ”krenar për Shqipërinë”.

“Keni ardhur nga larg, nga tokat e vendet tuaja. Nga shtëpitë tuaja, erdhët për ne. Zbritët nga avionët duke buzëqeshur, duke mbajtur me krenari flamujt tuaj”, thuhet në videomesazhin falenderues, duke veçuar edhe një pjesë nga deklarata e Kryeministrit Rama që “shqiptarët dhe Shqipëria nuk e braktisin kurrë një mik të vështirësi”.

Nën ngjyrat e rajonit të Lombardisë, falënderohen të gjitha shtetet që kontribuuan për Lombardinë. /a.g//r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.