Pensionistët në liri, nesër deri në orën 11:00 / Policia e Shteti: Jo më shumë se dy persona bashkë

TIRANË, 17 prill /ATSH – I. Vata/-Policia e Shtetit, bazuar në urdhrin e fundit të Kryeministrit të vendit, për lejimin e pensionistëve për të dalë ditën e shtunë deri në orën 11:00, do të mirëpresë e asistojë pensionistët, për të respektuar distancimin social.

Po ashtu, Policia e Shtetit kërkon mirëkuptimin e pensionistëve që të mos ulen në grupe nëpër parqe apo lulishte, të mos jenë më shumë se dy persona bashkë dhe pas orës 11:00, duhet të kthehen në banesë. Shërbimet e Policisë do të jenë pranë tyre për çdo rast nevoje që ata mund të kenë.

“Ndërkohë, në të gjithë vendin do të vijojnë kontrollet e pandërprera kryesisht në qendrat urbane, për respektimin e karantinës. Do të lejohen të qarkullojnë me makinë, të pajisur me autorizim apo në këmbë, në itinerarin shtëpi – punë – shtëpi, pa asnjë ndalesë të gjithë personat që kanë autorizim për të punuar gjatë fundjavës”, thuhet në njoftimin e Policisë së Shtetit.

Po ashtu Policia e Shteti ju kërkon qytetarëve që të respektojnë oraret e vendosura dhe të mos dalin nga banesa deri në orën 5:00 të ditës së hënë.

“Të gjithë të tjerët duhet të respektojnë masat kufizuese për të mos dalë nga banesa deri në orën 05:00 të ditës së hënë, duke përjashtuar lëvizjet për emergjencat mjekësore”, shprehet Policia. /a.a/

 

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.