Majko i përgjigjet Vasilit: Rregullat e luftës janë të ashpra, diskutohen vetëm pas mbarimit të saj

TIRANË, 6 prill /ATSH – I. Vata/ Ministri i Shtetit për Diasporën, Pandeli Majko ka reaguar sot në lidhje me qëndrimin e nënkryetarit të LSI-së, ish-socialist, i cili pretendon se nuk po bëhet asgjë për situatën emergjente të COVID-19 si dhe për njerëzit e mbetur në kufi.

Majko shprehet se “sot pashë se një ish-socialist (Petrit Vasili) që gjen kënaqësinë duke goditur ish-shtëpinë e tij. Ai aludonte se nuk po bëhej (dhe bëja) asgjë për fatin e njerëzve të bllokuar në kufirin shtetëror nga emergjenca kombëtare. Logjika të tilla në “kohë kolere” janë të justifikuara! Inati e ka rrugën e gjatë! Puna si rregull bëhet në zyrë dhe ku nuk kam munguar asnjë ditë!”

“Megjithëse jashtë fushës së përgjegjësisë sime, por me përgjegjësi njerëzore, kam komunikuar prej ditësh me Kryeministrin, Ministrin e Brendshëm, Ministren e Shëndetësisë, Ministrin në detyrë për Europën dhe Politikën e Jashtme, zëvendësministren e Brendshme dhe zëvendësministrin (tjetër) në Ministrinë e për Europën dhe Politikën e Jashtme dhe vazhdoj të komunikoj. Shpresoj, që rregullat e emergjencës dhe taskforca që drejton atë do të gjejnë mekanizmin e zgjidhjes së situatës!”, shprehet ai.

Po ashtu Majko shton se “kjo është luftë! Dikush mund t’i duket retorikë, por ende s’ka kuptuar se bota po ndryshon me egërsimin e gjendjes së pandemisë! Dhe kjo që po ndodh është një gjendje lufte e paprecedentë! Rregullat e saj janë të ashpra dhe urdhrat diskutohen vetëm pas mbarimit të saj! Por, edhe në luftë, diskutimet janë të lejuar nga distanca! Dikush nuk sheh aspak luftën, por interesat e pushtetit pas saj! Dikush do të thotë se ai është më “burrë i zoti”. Psherëtimat politike në kohë kolere kanë erën e saj! Duke njohur gjendjen e luftës, ju siguroj se kam parë të gjithë të vërtetat që mund të duroj. Ky është momenti ku ndahen karakteret dhe ndarjet politike kanë të bëjnë shumë pak! Kjo është një kohë e cila kërkon reflektim dhe jo “batuta”. Rezultatet e postluftës aktuale do të jenë të trishta. Ato do të godasin ekonominë dhe elitat politike të qarta në paqartësi!”

Majko thekson se “opozita në Tiranë është e qartë vetëm për atë që nuk do! Diskreditimi i marrëdhënies politike nuk është opozitarizmi më efikas! Opozita nuk ka kuptuar se bashkë me virusin ndarjet e ideologjisë e majtë e djathtë po “vdesin” nën presionin e opinionit publik të rrjeteve sociale! Një milion refugjatë sirianë ndryshuan një pjesë të strukturës politike europiane. Në një pjesë të Europës ndodhi “zëvendësimi” i opozitave! E njëjta situatë rrezikon edhe në Shqipëri! Shqetësimi për qytetarët e bllokuar në kufi është legjitim! Mënyra e të kërkuarit është sikur në Shqipëri ska ndodhur asgjë, a thua se ka ikur energjia elektrike e cila do të vijë pas pak…!”

“Ju siguroj se jemi në punë pa qenë on-line! Publiku do rezultate dhe jo një teatër partizan në rrjetet sociale. Kujdesi i tepërt në emergjencën kombëtare është ana e keqe por edhe ana më emirë e trajtimit të kësaj krize nga qeveria. Kush dëshiron të ndihmojë është i mirëpritur! Kush dëshiron të kritikojë e ftoj për mirëkuptimin që funksionon në të tilla raste! Uroj të kuptoni rregullin e artë të Luftës. Ai është, të shpresosh më të mirën dhe të përgatitesh për më të keqen! Besoni të parën dhe mos harroni të dytën!”, shprehet ai.

Në lidhje me emigrantët që qëndrojnë në Kapshticë, Vasili tha sot se Kryeministri Rama dhe Majko flenë në shtëpi, ndërsa emigrantët jashtë. /a.a//r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.