TIRANË, 24 mars/ATSH/ Sekretarja e Përgjithshme e Këshillit të Bashkëpunimit Rajonal, Majlinda Bregu, duke e cilësuar një gëzim të mrekullueshëm hapjen e negociatave me Bashkimin Europian për Shqipërinë, theksoi “urime të gjithëve që në këtë orvatje të gjatë të shqiptarëve drejt Europës kanë zbuluar të vërteta, janë ndërgjegjësuar e do të vazhdojnë të punojnë”.
“Shumë herë e kam imagjinuar këtë ditë, por asnjëherë se do të vinte kështu. E brishtë, e tendosur, e munduar nga lodhja e çapitjes sonë të gjatë drejt saj. Asfare s’e kisha menduar që të ngërthyer mes krizave e së fundmi kërcënimeve prej një virusi mizor, do të na dukej kjo ngjarje si dytësore. Ja pra si për ironi të fatit, shembja e murit e çelja e portës për të hyrë më në fund në Europë duhej të vinte në këtë realitet, kur muret po na rezultojnë trishtueshëm e vetmja siguri”, – thekson Bregu.
Bregu u shpreh se “urime të gjithëve që në këtë orvatje të gjatë të shqiptarëve drejt Europës kanë zbuluar të vërteta, janë ndërgjegjësuar e do të vazhdojnë të punojnë të qartë se nga arritjet te zhgënjimet; nga përpjekjet te bllokimet, nga kokëfortësia te lëshimet; nga paragjykimet te vetëpërmbajtja, kjo është rruga jonë. Më mirë vonë, se kurrë”./k.s/