COVID-19: Orari i punës për administratën është 08:00-13:00

TIRANË, 21 mars/ATSH/ Orari i punës për nëpunësit civilë dhe punonjësit e tjerë të administrates publike/shtetërore është 08:00-13:00.

Në Fletoren Zyrtare është botuar vendimi i Këshillit të Ministrave i cili synon parandalimin dhe luftimin e COVID-19.

“Gjatë periudhës së gjendjes së epidemisë së shkaktuar nga COVID-19, orari i punës për nëpunësit civilë dhe punonjësit e tjerë të administrates publike/shtetërore është 08:00-13:00”, thuhet në vendim.

Nëpunësit civilë dhe punonjësit gjatë kësaj periudhe, ngarkohen të kryejnë çdo detyrë funksionale që iu ngarkohet nga eprori i drejtpërdrejtë apo titullari i institucionit, e cila mund të përmbushet në kushtet e banesës, nëpërmjet komunikimit telefonik apo të mënyrave të tjera të komunikimit elektronik.

Ky vendim hyn në fuqi menjëherë./a.gjonaj/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.