Prodhimi i bollshëm bujqësor uli inflacionin mesatar në 1.4% gjatë 2019-ës

TIRANË, 17 shkurt /ATSH/- Inflacioni mesatar për vitin 2019 rezultoi 1.4%, bëri të ditur Banka e Shqipërisë, në raportin e publikuar së fundi mbi politikën monetare.

Sipas BSH-së, norma mesatare e inflacionit shënoi vlerë të ulët në tremujorin e fundit të vitit 2019 (1.3%) ndikuar nga kategoria “Ushqime e prodhim bujqësor” që pati intensitet më të lartë se sesa vitin e kaluar.

Inflacioni i këtij tremujori u përcaktua në masën 85% nga luhatjet e çmimeve të mallrave ushqimore. Brenda këtij grupi mallrash, vazhdon të jetë veçanërisht i spikatur kontributi i çmimeve të mallrave në kategorinë “ Ushqime të papërpunuara”, duke formuar rreth 60% të shifrës së inflacionit total.
Në dy muajt e parë të tremujorit, kjo kategori shënoi rritje në termat e inflacionit dhe të kontributeve. Ndërkohë, në muajin dhjetor, vlera e kontributit të nëngrupeve të veçanta brenda kësaj kategorie u dominua nga ajo e zërit “perime”, e cila shkaktoi rënien e kontributit të kësaj kategorie me 0.3%.
Kushtet e favorshme klimaterike, shtimi i prodhimeve nga serat, presionet e dobëta
nga kostot prodhuese për shkak të çmimeve më të ulëta të karburanteve, rritja e konkurrencës në tregjet e prodhimeve bujqësore, janë faktorë që kanë nxitur
ngadalësimin e inflacionit të kategorisë përkatëse.
Çmimet e komponentëve të tjerë më të qëndrueshëm të inflacionit, ku përfshihen
çmimet e shërbimeve, strehimit dhe mallrave të konsumit afatgjatë, patën gjithashtu një kontribut më të ulët te norma e inflacionit krahasuar me një tremujor më parë (0.2% nga 0.3%. e.xh/

 

 

 

 

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.