Kuvendi miratoi ligjin “Për Rininë”, plotësohet kuadri ligjor ekzistues

TIRANË, 4 nëntor /ATSH/ Kuvendi i mbledhur sot në seancë plenare miratoi projektligjin “Për rininë” me 79 vota pro 23 kundër dhe 4 abstenim. Ky projektligj ka si qëllim përcaktimin e veprimtarive, të mekanizmave dhe të autoriteteve përgjegjës për mbrojtjen dhe promovimin e të drejtave të të rinjve dhe synon plotësimin e kuadrit ligjor ekzistues që ndikon tek të rinjtë si edhe rritjen e pjesëmarrjes së tyre në proçeset politikbërëse dhe vendimmarrëse.

Për projektligjin “Për aderimin e Republikës së Shqipërisë në Konventën Ndërkombëtare për Luftën Kundër Falsifikimit të Monedhës” në emër të grupit parlamentar te PS, fjalën e mori Elona Gjebrea e cila tha se projektligji ka për qëllim aderimin e Republikës së Shqipërisë në Konventën Ndërkombëtare në luftën kundër falsifikimit të monedhës nënshkruar në Gjenevë më 20 Prill 1929. Votimi i këtij projektligji u shty për seancën e radhës

Akti normativ nr. 2, datë 02.10.2019, “Për disa ndryshime në ligjin nr. 99/2018, “Për buxhetin e vitit 2019” u miratua me 80 vota pro 25 kundër dhe 3 abstenim.

Akti  normativ nr. 3, datë 02.10.2019, “Për disa shtesa në ligjin nr. 9632, datë 30.10.2006, “Për sistemin e taksave vendore”, të ndryshuar u miratua me 83 vota pro 22 kundër dhe 2 abstenim. /j.p/

 

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.