BULLGARI – Dëbohet diplomati rus i akuzuar për spiunazh

SOFJE, 29 tetor /ATSH-ANSA/ – Autoritetet e Sofjes kanë dëbuar një diplomat rus të dyshuar për spiunazh, ndërkohë që sipas Ministrisë së Jashtme bullgare zyrtari në fjalë, sekretari i parë i ambasadës së Federatës Ruse në Bullgari, tashmë është larguar nga vendi.

Diplomati u hetua nga prokuroria speciale, pas raportimit nga Agjencia e Sigurisë së Shtetit (DANS).

Në veprimtarinë e tij të spiunazhit diplomati, duke filluar nga shtatori 2018, takohej rregullisht me qytetarë bullgarë, përfshirë një zyrtar të lartë me qasje në informacione të klasifikuara në lidhje me Bullgarinë, BE-në dhe NATO-n.

Ambasada ruse në Sofje nuk pranoi të komentojë mbi dëbimin e diplomatit./   /os/ a.jor.

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.