TIRANË, 4 tetor /ATSH/ Shqipëria do të mirëpresë shtetet pjesëmarrëse të OSBE-së dhe Partnerët Mesdhetarë në Konferencën e OSBE për Mesdheun në 24-25 Tetor në Tiranë.
Ambasadori i Shqipërisë pranë Misionit të OSBE-së dhe Organizatave Ndërkombëtare në Vjenë, Igli Hasani i’u drejtua Forumit Mesdhetar të Asamblesë Parlamentare të OSBE-së në Marrakesh të Marokut.
Ambasadori Hasani u shpreh se, “përtej referencave gjeografike, Shqipëria ndan lidhje të forta kulturore dhe politike me rajonin e Mesdheut”.
“Në 25 vjetorin e Grupit të Kontaktit Mesdhetar, ne mezi presim të mirëpresim Shtetet pjesëmarrëse të OSBE-së dhe Partnerët Mesdhetarë në Konferencën e OSBE për Mesdheun, që do të mbahet në 24-25 Tetor në Tiranë, Shqipëri”, tha ai.
OSBE dhe Partnerët e saj të Mesdheut (Algjeri, Egjipt, Izrael, Jordani, Marok dhe Tunizi) do të festojnë këtë vit përvjetorin e 25-të. Gjatë Samitit të vitit 1994 në Budapest, u krijua një kornizë e re për bashkëpunim, i cili njihet sot si Grupi i Kontaktit me Partnerët e Mesdheut.
Ky dialog i vazhdueshëm u bë një platformë e qëndrueshme për “shkëmbimin e informacionit me interes të ndërsjellë dhe gjenerimin e ideve”, në Konferencat vjetore të Mesdheut.
/gj.mima/j.p/