ARABI SAUDITE – Ofrohen për herë të parë viza turistike ndërkombëtare

RIAD, 27 shtator /ATSH-DPA/ Arabia Saudite do të hapë për herë të parë dyert për turistët ndërkombëtarë, nën një regjim të ri vizash që do të shpallet sot në mbrëmje, deklaroi Komisioni saudit për Turizmin dhe Trashëgiminë Kombëtare.

Kjo lëvizje është pjesë e përpjekjeve të mbretërisë për të rritur turizmin.

Riadi synon të rrisë vizitat ndërkombëtare dhe vendase në 100 milion në vit deri në vitin 2030.

“Lejimi i turistëve ndërkombëtarë në Arabinë Saudite është moment historik për vendin tonë”, deklaroi sot për mediet kryetari i këtij komisioni, Ahmad Al-Khateeb.

Arabia Saudite ka qenë gjithmonë një ndër vendet më të vështira për të lejuar vizitat e turistëve duke dhënë viza vetëm për udhëtime afatshkurtra biznesi, pelegrinazh fetar ose për udhëtarët me familje në këtë vend.

Detajet në lidhje me skemën e re të vizave dhe planet më të gjera të turizmit do të njoftohen sot në një mbrëmje gala.

Mbretëria tepër konservatore është në përpjekje për të tërhequr pushuesit ndërsa kërkon të diversifikojë ekonominë e vendit dhe të limitojë varësinë e saj nga nafta./ /sara/ a.jor.

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.