Zyrat e aplikimit për karta ID, të hapura dhe të shtunën

TIRANË, 23 gusht /ATSH – I. Vata/ – Ministria e Brendshme deklaroi sot se zyrat e aplikimit për dokumente identiteti (ID) do të qëndrojnë të hapura edhe të shtunave, me qëllim që qytetarët dhe emigrantët të kenë më shumë mundësi aplikimi dhe njëherësh të kursejnë kohë të vlefshme.

Po ashtu, Ministria e Brendshme sqaron se zyrat e shërbimit të qytetarëve në Policinë e Shtetit si dhe zyrat e Gjendjes Civile do të jenë gjithashtu të hapura të shtunave, duke krijuar kështu lehtësira për çdo shtetas që ka nevojë për rinovimin e dokumenteve të identitetit.

Ministria e Brendshme u bën thirrje të gjithë qytetarëve që këtë vit u skadojnë dokumentet e identitetit, të aplikojnë për karta identiteti dhe pasaporta biometrike, pasi që nga muaji tetor 2019, do t’iu kushtëzohet shërbimi nëse do të jenë të papajisur me kuponin e aplikimit. /j.p/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.