BRUKSEL – Eurozona mirëpret aplikimin e Kroacisë për t’iu bashkuar monedhës unike

BRUKSEL, 8 korrik /ATSH-DPA/ – Ministrat e Financave të eurozonës mirëpritën sot aplikimin e Kroacisë për t’iu bashkuar monedhës unike duke e quajtur këtë lëvizje një shenjë besimi tek euro.

Kroacia dorëzoi të enjten e kaluar aplikimin e saj për t’u bërë pjesë e monedhës unike duke filluar një proces që me shumë mundësi do të kërkojë një vit kohë.

“Qëllimi i Kroacisë tregon se zona euro është një ankorim i qëndrueshëm për stabilitet dhe rritje në Europë dhe që vazhdon të tërheqë anëtarë të rinj”, tha Mario Centeno, kreu i Eurogrupit, i përbërë nga ministrat e Financave të eurozonës.

“Masat që ka marrë Zagrebi për mbikëqyrjen bankare, qeverisjen dhe çështje të tjera kyçe tregojnë vendosmërinë e Kroacisë për të qenë pjesë e familjes euro”, shtoi ai./ /G.S/ a.jor.

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.