“Mësues për Shqipërinë”, procedura e plotë e punësimit të mësuesve

TIRANË, 10 qershor/ATSH/ – Pas mbylljes së fazës së parë të aplikimit në portalin “Mësues për Shqipërinë” tanimë konkurrentët do t’i nënshtrohen testimit që nis më 10 korrik.

Me pikët e mbledhura nga dosjet profesionale, ata do të aplikojnë në portalin “Mësues për Shqipërinë”, për t’u bërë pjesë e testimit. Provimi, i ngjashëm me atë të licencës, do të zhvillohet në bazë të një kalendari.

Me mbylljen e fazës së parë do të kalkulohet numri i saktë i mësuesve për çdo profil, në bazë të të cilit Qendra e Shërbimeve Arsimore do të përcaktojë datat në bazë të profileve të mësuesisë. Kandidatët pajisen me formularin e pjesëmarrjes në testimin e informatizuar nga zyra vendore e arsimit ku kanë aplikuar përmes postës.

Me anë të tij, regjistrohen online në portal, sapo ai të jetë aktiv. Nga ana tjetër, katër drejtoritë rajonale të arsimit dërgojnë në ministri dhe QSHA listat e kandidatëve të kualifikuar bashkë me pikët e dosjes, të cilat do t’i bashkëngjiten atyre të testimit.

Me udhëzimin e ri, nr. 13, datë 22.05.2019, hartohet lista me kandidatët e renditur nga ata me më shumë pikë deri tek ata që kanë mbledhur më pak.

Të parët në listë kanë mundësinë e punësimit në vendin e parë që do të hapet në shtator në profilin ku ka aplikuar.

Drejtoritë rajonale kanë detyrimin të shpallin vendet vakante si dhe punësimet për çdo institucion arsimor në portalin “Mësues për Shqipërinë”. Mësuesi, kur pranon të punësohet në një vend të lirë pune, do të ketë aksesin në platformë, duke marrë një fletë konfirmimi, të cilën do ta paraqesë tek drejtori i shkollës dhe më pas do të lidhë kontratën e punës me të.

Ndryshe nga më parë, ku mundësitë e refuzimit ishin deri në tri herë, tashmë më të mirët kanë shanse të panumërta ofertash të lira, deri në hapjen e portalit të ri.

Një tjetër risi është shmangia e drejtorive arsimore. Në çdo vend vakant që hapet, ata njoftohen automatikisht nga portali. Nëse nuk iu duket e përshtatshme dhe nuk paraqiten brenda 24 orëve në shkollë, përgjigjja e tyre quhet refuzuese.

Ndërkaq, të punësuarit nuk do të vihen më në provë 1-vjeçare, por emërohen direkt nga drejtori i shkollës dhe ngarkohet me orë të plota mësimore. Portali i punësimit të mësuesve u çel më 23 maj 2019 dhe u bë i ditur nga ministrja e Arsimit, Sportit dhe Rinisë, Besa Shahini. /z.tosku/ /a.g/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.