Lajčák: Protestat e dhunshme pengojnë reformat e Shqipërisë, dialog për zgjidhjen e krizës

TIRANË, 3 qershor /ATSH-Gjergji Mima/ “Përshkallëzimi i dhunës gjatë disa protestave të drejtuar nga opozita, është bërë shumë e mërzitshme. Trazirat nuk duhet të zëvendësojnë angazhimin demokratik, përkundrazi ato heqin çdo shans për dialog dhe çdo shans për të gjetur një terren të përbashkët”, deklaroi sot në Tiranë, kryetari i radhës së OSBE-së, Ministri i Punëve të Jashtme dhe Europiane të Republikës Sllovake, Miroslav Lajčák.

Në një konferencë me ministrin në detyrë për Europën dhe Punët e Jashtme, Gent Cakaj, kryediplomati sllovak tha se “vazhdimi i protestave të dhunshme do të dëmtojë përpjekjet e Shqipërisë për reforma dhe padyshim do të pengojë për realizimin e përparësive të brendshme dhe ndërkombëtare”.

Lajçak tha se e vetmja mënyrë për të gjetur zgjidhje për krizën politikë është dialogu konstruktiv.

I pyetur për zgjedhjet e 2017-ës, ai tha se “zgjedhjet në Shqipëri janë monitoruar nga autoritete ndërkombëtare përfshirë OSBE-ODIHR që është autoriteti më i lartë në këtë drejtim dhe ka pasur raporte që tregojnë së pari, se procesi juaj zgjedhor përmbush kërkesat e zgjedhjeve të lira dhe të ndershme”.

“Shumë breza të Shqipërisë kanë ëndërruar të kenë zgjedhje të drejta dhe të ndershme dhe kjo e drejtë duhet respektuar që njerëzit të shprehin vullnetin e tyre”, theksoi Lajčák.

“Zgjedhjet në Shqipëri janë monitoruar nga autoritete ndërkombëtare përfshirë OSBE-ODIHR që është autoriteti më i lartë në këtë drejtim dhe ka pasur raporte që tregojnë së pari, se procesi juaj zgjedhor përmbush kërkesat e zgjedhjeve të lira dhe të ndershme. Njëkohësisht ODIHR ka nxjerrë rekomandime për përmirësimin e mëtejshëm të procesit zgjedhor”, shtoi ai.

Prandaj, nënvizoi Lajčák, “rruga drejt zgjidhjes është që të zbatohen më mirë këto rekomandime dhe si të përmbushen standardet më të larta për të siguruar zgjedhje të ndershme dhe të lira”.

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.