BE mbështet praktikën e 100 të rinjve në kompanitë vendore

PRISHTINË, 17 prill /ATSH/ 100 të rinj nga rajoni i Gjilanit sot do të nënshkruajnë praktikën me kompani vendore, me qëllim të gjetjes së vendeve të përhershme të punës në të ardhmen.

Kjo është bërë e mundur përmes mbështetjes së Bashkimit Europian dhe akti i nënshkrimeve do të bëhet në praninë e shefes së Zyrës së BE-së në Kosovë dhe përfaqësueses së Posaçme të BE-së, Nataliya Apostolova.

Aty do të marrin pjesë edhe kryetari i komunës së Gjilanit, Lutfi Haziri dhe udhëheqës të kompanive që ofrojnë praktikën.

Ambasadorja Apostolova do të bisedojë me praktikantët për pritjet e tyre nga kjo mundësi e rëndësishme dhe do të dëgjojë pikëpamjet e tyre mbi të ardhmen e Kosovës dhe rolin e BE-së në të.

Ambasadorja gjithashtu do të takohet me komunitetin e biznesit dhe qytetarët e Gjilanit, për të biseduar për perspektivat ekonomike në rajon dhe çfarë do të thotë ky lloj i mbështetjes së BE-së për punësim dhe krijimin e kushteve për të rinjtë që të mbesin në rajon. /KosovaPress/ /a.g/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.