Task Forca Antikorrupsion, 18 masa disiplinore në ZRPP Kavajë

TIRANË, 27 mars/ATSH/- Ministrja e Drejtësisë, Etilda Gjonaj ka publikuar sot rezultatet javore të luftës ndaj korrupsionit. Ajo ka sqaruar se përdorimi i inovacionit si instrument në luftën kundër korrupsionit dhe ndaj praktikave korruptive vijon të rezultojë një instrument i rëndësishëm dhe i suksesshëm.

“Dua të theksoj se, për periudhën janar-dhjetor 2018, janë shtuar 64 shërbime të reja elektronike, duke e çuar numrin total të shërbimeve elektronike në 591, nëpërmjet të cilave qytetarët mund të aksesojnë shërbimet në mënyrë elektronike”, – tha Gjonaj.

“Gjithnjë e më shumë, qytetarët janë të ndërgjegjshëm se përfshirja e tyre nëpërmjet denoncimeve pranë institucioneve përkatëse, si dhe përdorimi i instrumentit denoncues siç është dhe portali i bashkëqeverisjes, është e domosdoshme jo vetëm për adresimin e halleve dhe problemeve të tyre, por dhe në evidentimin e praktikave korruptive”, – shtoi Ministrja e Drejtësisë.

“Pas një denoncimi të kryer në platformën e bashkëqeverisjes “Shqiperiaqeduam.al”, Task Forca Antikorrupsion ka kryer kontroll në Zyrën Vendore të Regjistrimit të Pasurive të Paluajtshme Kavajë, me objekt verifikimin e zbatimit të urdhrit të Ministrit të Drejtësisë, nr. prot. 3981, datë 10.04.2018, “Për evidentimin, shqyrtimin dhe trajtimin e të gjitha aplikimeve të prapambetura ose jashtë afatit nga ana e ZVRPP-ve”, si dhe verifikimin e cilësisë dhe transparencës në ofrimin e shërbimeve ndaj qytetarit, që kryhen nga ky institucion”, – vijoi Ministrja.

“Nga kontrolli i Task Forcës Antikorrupsion janë evidentuar shkelje si në vijim: Nga praktikat e monitoruara rezultojnë aplikime të trajtuara jashtë afateve të parashikuara në urdhrin nr. 995, të kryeregjistruesit, për afatet e trajtimit dhe përpunimit të kërkesave nga zyrat e regjistrimit të pasurive të paluajtshme. Sistemi online i menaxhimit të aplikimeve nuk pasqyron situatën reale të praktikave të trajtuara ose jashtë afatit, për faktin se sistemi nuk administrohet/përdoret në të gjitha fazat e tij nga specialistët e ZVRPP Kavajë. Si dhe janë gjetur një numër i madh dosjesh/praktikash të vjetra të prapambetura e të patrajtuara”, – tha Gjonaj.

“Duke mbajtur në konsideratë shkarkimin nga detyra më herët të regjistrueses së ZVRPP Kavajë, për shkelje të evidentuara gjatë ushtrimit të detyrës prej saj, në përfundim të kontrollit janë rekomanduar edhe 17 masa të tjera disiplinore: “Vërejtje me paralajmërim për largim nga puna” për 11 specialistë të ZVRPP Kavajë. “Vërejtje me shkrim” për 6 specialistë të kësaj zyre. Gjithashtu, janë rekomanduar edhe masa administrative për rregullimin e veprimtarisë së brendshme të institucionit dhe përmirësimin e cilësisë së shërbimit ndaj qytetarëve”, – theksoi Ministrja e Drejtësisë.

“Dua të sjell në vëmendje të qytetarëve, se me hyrjen në fuqi të ligjit për ngritjen e Agjencisë Shtetërore të Kadastrës, e cila do të fillojë punë së shpejti, do t’u kursejmë qytetarëve sorollatjet e panumërta, sa nga një institucion në tjetrin”, – tha Gjonaj.

“Gjithashtu, kontrolle periodike po ushtrohen edhe nga Shërbimi i Kontrollit të Brendshëm në Sistemin e Burgjeve. Në datën 20.03.2019, janë referuar në Prokurorinë e Rrethit Gjyqësor Korçë materialet procedurale, për një ngjarje të ndodhur në IEVP Korçë si dhe janë referuar në Prokurorinë e Rrethit Gjyqësor Tiranë, materialet procedurale në ngarkim të dy punonjësve të policisë pranë DPB-së, për veprën penale të shpërdorimit të detyrës”, – vijoi Gjonaj.

“Në të njëjtën kohë nga strukturat kundër korrupsionit, në Policinë e Shtetit, gjatë kësaj jave janë evidentuar 10 vepra penale, ku 15 autorë u proceduan penalisht për krime në fushën e korrupsionit pasiv të personave që ushtrojnë funksione publike dhe shpërdorimit të detyrës. Për të gjitha rastet e evidentuara, nga strukturat për hetimin e korrupsionit, janë kryer veprimet hetimore dhe materialet janë referuar në Prokurori”, – shtoi Gjonaj. /j.p/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.